കരിന്തളം പവർസ്​റ്റേഷൻ വൈദ്യുതി ലൈൻ വലിക്കുന്നതിനെതിരെ നാട്ടുകാർ

നീലേശ്വരം: കിനാനൂർ കരിന്തളം പഞ്ചായത്തിലെ കയനിയിൽ നിർമിക്കുന്ന 400 കെ.വി പവർ സ്​റ്റേഷനിൽനിന്ന് വൈദ്യുതി ലൈൻ വലിക്കുന്നതിനെതിരെ എതിർപ്പുമായി നാട്ടുകാർ. വൈദ്യുതിലൈൻ കടന്നുപോകുന്ന ആനപ്പെട്ടി ശാസ്താംപാറയിലെ കുടുംബങ്ങളാണ് കർമസമിതി രൂപവത്​കരിച്ച് സമരം നടത്തുന്നത്.

ആനപ്പെട്ടിയിൽ താമസിക്കുന്ന മുപ്പതോളം കുടുംബങ്ങളുടെ വീടും കൃഷിസ്ഥലങ്ങളും പൂർണമായും നഷ്​ടപ്പെടുന്നതാണ് പ്രതിഷേധത്തിന്​ കാരണം. ഇവരുടെ തെങ്ങ്, കവുങ്ങ്, റബർ മരങ്ങൾ എന്നിവ മുറിക്കേണ്ട അവസ്ഥയാണ്. മതിയായ നഷ്​ടപരിഹാരം നൽകിയാൽ മാത്രമേ സ്ഥലം വിട്ടുനൽകുകയുള്ളൂ എന്നാണ് ഇവരുടെ നിലപാട്​. എന്നാൽ, പവർസ്​റ്റേഷൻ അധികൃതർ മരങ്ങള്‍ മാര്‍ക്ക് ചെയ്തതും സ്ഥലം അളന്നതും സ്ഥലം ഉടമകളുടെ അനുവാദം ഇല്ലാതെയാണെന്നുമാണ് നാട്ടുകാർ പറയുന്നത്.

ടവര്‍ നിര്‍മാണവുമായി ബന്ധപ്പെട്ട് സ്ഥലവും മരങ്ങളും നഷ്​ടപ്പെടുന്ന ഉപഭോക്താക്കള്‍ യോഗംചേര്‍ന്ന് കർമസമിതി രൂപവത്​കരിച്ചു. സ്ഥലങ്ങളും മരങ്ങളും നഷ്​ടപ്പെടുന്നവര്‍ക്ക് അര്‍ഹമായ നഷ​ടപരിഹാരം ലഭിക്കുന്നതുവരെ പ്രതിഷേധം തുടരാന്‍ തീരുമാനിച്ചു. കോടോംബേളൂര്‍ പഞ്ചായത്ത് 12ാം വാര്‍ഡ് മെംബര്‍ അഡ്വ. ഷീജ അധ്യക്ഷത വഹിച്ചു. നാരായണന്‍, ബാലചന്ദ്രന്‍ പുഷ്പഗിരി, പി. പ്രദീപ്കുമാര്‍, രഞ്ജിത്ത് കുമാര്‍ മൂലക്കല്‍, സജി ശാസ്താംപാറ എന്നിവർ സംസാരിച്ചു.