സ്ഥാനാർഥിയോടൊപ്പം പാട്ടുപാടി വോട്ട് തേടി മുൻ മന്ത്രി

കാലടി: മരോട്ടിച്ചോട്ടിൽ മുൻ മന്ത്രി സ്ഥാനാർഥിയോടൊപ്പം പാട്ടുപാടി വോട്ട് തേടി. ഗായികയും ഗ്രാമപഞ്ചായത്തിൽ 17ാം വാർഡിലെ എൽ.ഡി.എഫ് സ്വതന്ത്രസ്ഥാനാർഥിയുമായ റീജ ആൻറുവി​െൻറ മരോട്ടിച്ചോട്ടിലെ വീട്ടുമുറ്റത്തെ സ്നേഹസദസ്സിൽ മുൻമന്ത്രി അഡ്വ. ജോസ് തെറ്റയിലാണ്​ പാടിയത്​.

നാടി​െൻറ വിവിധ ഭാഗങ്ങളിൽനിന്നെത്തിയ റീജയുടെ സുഹൃത്തുക്കളായ പാട്ടുകാരും കൂടെ പാടി. ഞായറാഴ്ചകളിൽ വീട്ടുമുറ്റത്തെ അയൽക്കാരുടെ സദസ്സിൽ റീജ പാടാറുണ്ട്​.

സ്ഥാനാർഥി ആയിട്ടും പതിവ് തെറ്റിയില്ല. അടുത്തയിടെ റീജയുടെ ഈ ഗാനസദസ്സ്​ സമൂഹമാധ്യമങ്ങളിലും വൈറൽ ആയിരുന്നു. ഇതേതുടർന്നാണ് ജോസ് തെറ്റയിൽ പാടാനെത്തിയത്. അയൽക്കാരും സദസ്സിൽ പങ്കുചേർന്നു. പെരിയാറേ.. പെരിയാറേ.... എന്ന് തുടങ്ങുന്ന ഗാനമാണ് ജോസ് തെറ്റയിലും റീജയും ചേർന്ന് ആലപിച്ചത്.