സ്വപ്നക്കും കുടുംബത്തിനും താങ്ങായി കലക്​ടറെത്തി

പറവൂർ: പ്രളയം തകർത്തെറിഞ്ഞ ജീവിതം തിരിച്ചുപിടിക്കാൻ കുടുംബത്തിന്​ ജില്ല കലക്ടറുടെ സഹായഹസ്തം. വടക്കേക്കര പഞ്ചായത്തിലെ കുഞ്ഞിത്തൈ തെറിയ്ക്ക വില്ലയിൽ സ്വപ്നക്കും കുടുംബത്തിനുമാണ് കലക്ടർ എസ്. സുഹാസ് വീട്ടിലെത്തി രണ്ടുലക്ഷം രൂപയുടെ ചെക്ക് നൽകിയത്. കൂടാതെ പ്രളയത്തി​െൻറ നഷ്​ടപരിഹാരമായി അനുവദിച്ച ഒന്നേകാൽ ലക്ഷം രൂപയും എൻ.ജി.ഒ സ്വരൂപിക്കുന്ന ഒരുലക്ഷവും കൈമാറുമെന്ന് കലക്ടർ ഉറപ്പുനൽകി. സ്വപ്നയും മൂന്ന് പെൺകുഞ്ഞുങ്ങളും ഭർത്താവ്​ ആൻറണിയും മാതാവും അടങ്ങുന്ന ആറംഗ കുടുംബം അന്തിയുറങ്ങുന്നത് പ്ലാസ്​റ്റിക് ഷീറ്റ് മേഞ്ഞ കുടിലിലാണ്. ജീർണാവസ്ഥയിലായിരുന്ന ഓടിട്ട വീട് കുത്തൊഴുക്കിൽ അപകടസ്ഥിതിയിലായി.

പ്രളയ നാശനഷ്​ടം കണക്കാക്കിയപ്പോൾ അനുവദിച്ചത് ഒന്നേകാൽ ലക്ഷം മാത്രമാണ്. ഈ തുകക്കായി ഇവർ കലക്ടറേറ്റിൽ കയറിയിറങ്ങിയതിന് കണക്കില്ല. അക്കൗണ്ട് നമ്പർ മാറി അനർഹരായ ആർക്കോ തുക കൈമാറിയതായാണ് രേഖകൾ വ്യക്തമാക്കുന്നത്. മത്സ്യത്തൊഴിലാളിയായ ആൻറണിയുടെ തുച്ഛ വരുമാനത്തിലാണ്​ ജീവിതം . മാധ്യമങ്ങളിൽ ദയനീയസ്ഥിതി വാർത്തയായതിനെത്തുടർന്നാണ് കലക്ടർ നേരിട്ട് ഇടപെട്ടത്.

പഞ്ചായത്ത് വികസനകാര്യ സ്ഥിരംസമിതി അധ്യക്ഷ മിനി വർഗീസ് മാണിയാറ, തഹസിൽദാർ ജെഗ്ഗി പോൾ, ഡെപ്യൂട്ടി തഹസിൽദാർമാരായ ടി.എഫ്. ജോസഫ്, ടി.ആർ. സംഗീത്, വില്ലേജ് ഓഫിസർ ഷാജഹാൻ തുടങ്ങിയവർ കലക്ടറോടൊപ്പം ഉണ്ടായിരുന്നു.