'നഗരസഭ പെൻഷൻകാരോടുള്ള വിവേചനം അവസാനിപ്പിക്കണം'

നഗരസഭ പെൻഷനേഴ്സ് ഫെഡറേഷൻ സംസ്ഥാന സമ്മേളനം ഇന്ന്​ കൊല്ലം: കേരള മുനിസിപ്പൽ ആൻഡ്​ കോർപറേഷൻ പെൻഷനേഴ്സ് ഫെഡറേഷ‍​ൻെറ (കെ.എം.സി.പി.എഫ്​) ഏഴാം സംസ്ഥാന സമ്മേളനം വെള്ളിയാഴ്ച കൊല്ലത്ത് നടക്കും​. സി. കേശവൻ മെമ്മോറിയൽ ടൗൺ ഹാളിൽ രാവിലെ 10ന്​ മന്ത്രി കെ.എൻ. ബാലഗോപാൽ ഉദ്​ഘാടനം നിർവഹിക്കും. മേയർ പ്രസന്ന ഏണസ്റ്റ്​ അധ്യക്ഷത വഹിക്കും. പൊതുസർവിസിൽനിന്ന്​​ ​വിരമിക്കുന്ന നഗരസഭ ജീവനക്കാർ കടുത്ത വിവേചനമാണ്​ നേരിടുന്നതെന്ന്​ ഫെഡറേഷൻ ഭാരവാഹികൾ വാർത്തസമ്മേളനത്തിൽ പറഞ്ഞു. നഗരസഭയിലെ ടെക്​നിക്കൽ ജീവനക്കാർക്ക്​ സർക്കാർ ശമ്പളവും പെൻഷനും നൽകുമ്പോൾ മറ്റ്​ ജീവനക്കാർക്ക്​ കോർപറേഷനുകളും മുനിസിപ്പാലിറ്റികളുമാണ്​ നൽകേണ്ടത്​. വിവിധ സർക്കാറുകൾ വകമാറ്റിയതിനാൽ സെൻട്രൽ പെൻഷൻ ഫണ്ടിൽനിന്ന് തുക അനുവദിക്കാനാകാത്ത സ്ഥിതിയാണ്​. നഗരസഭ പെൻഷൻകാർക്ക് പെൻഷനും ആനുകൂല്യങ്ങളും നൽകാനുള്ള ഉത്തരവാദിത്തം സർക്കാർ ഏറ്റെടുക്കണമെന്ന്​ കെ.എം.സി.പി.എഫ്​ ജനറൽ സെക്രട്ടറി കെ. വിജയരാഘവൻ, പ്രസിഡന്‍റ്​ വി.എൻ. പു​രുഷോത്തമൻ എന്നിവർ ആവശ്യപ്പെട്ടു. വൈസ്​ പ്രസിഡന്‍റ്​ ആർ. തുളസീധരൻ, സ്വാഗതസംഘം ജനറൽ കൺവീനർ ഡി. ഗോപാലകൃഷ്ണൻ നായർ, കൺവീനർ ആർ. സുനിൽബാബു എന്നിവർ പ​ങ്കെടുത്തു.