ദേശീയപാത വികസനം: നഷ്ടപരിഹാരം ലഭിക്കാതെ കടകൾ ഒഴിയില്ലെന്ന്​ വ്യാപാരികൾ

*അപേക്ഷയിലെ തെറ്റുകൾ തിരുത്താൻ ഹെൽപ്​ ഡെസ്ക്​ ​സേവനം കൊല്ലം: ദേശീയപാത വികസനത്തിന്​ ജില്ലയിൽ ഏറ്റെടുത്ത സ്ഥലങ്ങളിലെ വ്യാപാരികൾക്ക്​ നഷ്ടപരിഹാരം പൂർണമായും ലഭിച്ചാൽ മാത്രമേ കടകൾ ഒഴിഞ്ഞുനൽകൂ എന്ന്​ വ്യാപാരി വ്യവസായി സമിതി. ജില്ലയിൽനിന്ന്​ 2260 ​അപേക്ഷകളിൽ 360 എണ്ണം മാത്രമാണ്​ അധികൃതർ നഷ്ടപരിഹാരത്തിന്​ അർഹമാണെന്ന്​ കാണിച്ച്​ പാസാക്കിയിരുന്നത്​. കോവിഡ് കാലത്തെ ലൈസൻസില്ലാത്തവർ, കലക്ടറുടെ ഉത്തരവ് പ്രകാരം വില്ലേജ് ഓഫിസറുടെ സാക്ഷ്യപത്രം സഹിതം അപേക്ഷ നൽകിയതാണ്​ തള്ളിയത്​. ഈസാഹചര്യത്തിൽ​ ബുധനാഴ്ച വ്യാപാരികൾ നടത്തിയ കലക്​ടറേറ്റ്​ സമരത്തെ തുടർന്ന്​ എൻ.എച്ച്​ എൽ.എ ഡെപ്യൂട്ടി കലക്ടറുമായി നടത്തിയ ചർച്ചയിൽ നിബന്ധനകൾ ലഘൂകരിക്കാൻ ധാരണയായതായി വ്യാപാരി സമിതി നേതാക്കൾ വാർത്തസമ്മേളനത്തിൽ അറിയിച്ചു. ജൂൺ 30ന്​ മുമ്പ്​ നഷ്ടപരിഹാരം നൽകുമെന്നാണ്​ അറിയിച്ചിരിക്കുന്നത്​. കെട്ടിട ഉടമയിൽനിന്നും ഇക്കാലയളവിൽ കച്ചവടം നടത്തിയിരുന്നയെന്ന സമ്മതപത്രം നൽകിയാൽ മതിയാകും. ബാക്കി അപേക്ഷകളിലെ പോരായ്മ പരിഹരിക്കാൻ ജൂൺ ആറുവരെ സമയമനുവദിച്ചിട്ടുണ്ട്​. പോരായ്മ പരിഹരിച്ച്​ ​അപേക്ഷ വീണ്ടും സമർപ്പിക്കാൻ സഹായവുമായി കൊല്ലം ആണ്ടാമുക്കത്തുള്ള വ്യാപാരി വ്യവസായി സമിതി ജില്ല കമ്മിറ്റി ഓഫിസിൽ ഹെൽപ് ഡെസ്ക് പ്രവർത്തനം ആരംഭിച്ചതായും ഭാരവാഹികൾ അറിയിച്ചു. വാർത്തസമ്മേളനത്തിൽ കെ.കെ. നിസാർ, ആർ. രാധാകൃഷ്ണൻ, ആർ. സന്തോഷ്, മധുസൂദനൻ, സുനിൽ എന്നിവർ പങ്കെടുത്തു.