ഭക്ഷ്യവിഷബാധ: ഒരു കുടുംബത്തിലെ മൂന്നുപേർ ആശുപത്രിയിൽ

ചാത്തന്നൂർ: ഭക്ഷ്യവിഷബാധയേറ്റ്​ ഒരു കുടുംബത്തിലെ മൂന്നുപേർ ആശുപത്രിയിലായി. മീനാട് ചിറ്റുത്തറ വീട്ടിൽ ലീലാമ്മ, ബിജി സുരേഷ്, സൂര്യ എന്നിവരെയാണ് ഛർദിയും കടുത്ത വയറുവേദനയുമായി നെടുങ്ങോലത്തെ സ്വകാര്യ ആശുപത്രിയിൽ പ്രവേശിപ്പിച്ചത്. തിങ്കളാഴ്ച രാവിലെ ചാത്തന്നൂർ പൊതുചന്തയിൽ നിന്ന്​ വങ്കട മത്സ്യം വാങ്ങി കറി വെച്ച് കഴിച്ചതിനെ തുടർന്ന്​​ ഛർദിയും വയറുവേദയുമായി ഇവരെ ആശുപത്രിയിൽ പ്രവേശിപ്പിക്കുകയായിരുന്നു. ഗ്രാമപഞ്ചായത്ത്‌ അംഗം ബീനരാജ‍ന്‍റെ നേതൃത്വത്തിൽ ആരോഗ്യവകുപ്പ് അധികൃതർ സ്ഥലത്തെത്തി മേൽനടപടികൾ സ്വീകരിച്ചു. മീൻകറിയുടെ സാമ്പ്​ൾ പരിശോധനക്കയച്ചു.