കുട്ടിയെ കാണാതായ സംഭവം: ദുരൂഹത നീങ്ങാതെ അന്വേഷണം

അഞ്ചൽ: വീട്ടുമുറ്റത്തുനിന്ന്​​ രണ്ട് വയസ്സുകാരനായ കുട്ടിയെ കാണാതാകുകയും ഒരുരാത്രിക്ക് ശേഷം തിരികെ കിട്ടുകയും ചെയ്ത സംഭവത്തിലെ ദുരൂഹത നീങ്ങിയില്ല. ഒരാഴ്ച മുമ്പാണ് തടിക്കാട് കാഞ്ഞിരത്തറ ചണ്ണയ്ക്കാ പൊയ്കയിൽ കൊടിഞ്ഞിമൂല പുത്തൻവീട്ടിൽ അൻസാരി-ഫാത്തിമ ദമ്പതികളുടെ മകൻ രണ്ട് വയസ്സുള്ള മുഹമ്മദ് അഫ്രാനെ വൈകീട്ട് അഞ്ചോടെ കാണാതായത്. വ്യാപക തെരച്ചിലിനൊടുവിൽ പിറ്റേന്ന് പുലർച്ചെ ഏഴോടെ വീട്ടിൽ നിന്നും അരക്കിലോമീറ്ററോളം അകലെ മലമുകളിൽ റബർ തോട്ടത്തിൽ നിന്നാണ് കണ്ടെത്തിയത്. സംഭവത്തിൽ അഞ്ചൽ പൊലീസ്​ അന്വേഷണം കുട്ടിയുടെ ബന്ധുക്കളിലേക്കും പരിസരവാസികളിലേക്കും വ്യാപിപ്പിച്ചെങ്കിലും തുമ്പൊന്നും കിട്ടിയില്ല. മൊബൈൽ ഫോണുകൾ കേന്ദ്രീകരിച്ച്​ അന്വേഷണം നടത്തിയ പൊലീസ്​ പരിസരത്തെ നിരീക്ഷണ കാമറാ ദൃശ്യങ്ങളുൾപ്പെടെ പരിശോധിച്ചിരുന്നു.