അഞ്ചലിൽ എസ്.എഫ്.ഐ-കെ.എസ്.യു സംഘർഷം

അഞ്ചൽ: അഞ്ചലിൽ ഇരുവിഭാഗം വിദ്യാർഥികൾ തമ്മിലുണ്ടായ സംഘർഷത്തിൽ ഏഴ് പേർക്ക് പരിക്ക്. കഴിഞ്ഞ ദിവസം വൈകുന്നേരം അഞ്ചോടെ അഞ്ചൽ സൻെറ് ജോൺസ് കോളജ് ജങ്ഷനിലാണ് സംഘർഷം. പരിക്കേറ്റ എസ്.എഫ്.ഐ പ്രവർത്തകരായ അഫിലാഷ് (23), നസ്​ലിം (21), ഏരിയ സെക്രട്ടറി ഷാഹിൻ (21), അരവിന്ദ് (20) എന്നിവരെ അഞ്ചൽ ചന്തമുക്കിലെ സ്വകാര്യ ആശുപത്രിയിലും കെ.എസ്.യു പ്രവർത്തകരായ മാഹിൻ (24), യദു (20), സൗരവ് (19) എന്നിവരെ അഞ്ചൽ കോളജ് ജങ്ഷനിലെ സ്വകാര്യ ആശുപത്രിയിലും പ്രവേശിപ്പിച്ചു. എസ്.എഫ്.ഐ നടത്താനിരുന്ന 'അരങ്ങ് 2021' എന്ന പരിപാടി കോളജ് കാമ്പസിൽ നടത്തുന്നതിന് അധികൃതർ അനുമതി നിഷേധിക്കുകയുണ്ടായി. ഇതിൽ പ്രതിഷേധിച്ച് എസ്.എഫ്.ഐ പ്രവർത്തകർ കോളജ് കവാടത്തിന് മുന്നിൽ കൂടി മുദ്രാവാക്യം വിളിച്ചു. ഇതിനെത്തുടർന്ന്​ രണ്ട് കെ.എസ്.യു പ്രവർത്തകരും എസ്.എഫ്.ഐ പ്രവർത്തകരും തമ്മിൽ ചെറിയ തോതിൽ ഉന്തും തള്ളും ഉണ്ടായതാണ്​ സംഘർഷത്തിന്​ കാരണമായത്​. സംഭവത്തെത്തുടർന്ന് കോൺഗ്രസ് പ്രവർത്തകർ അഞ്ചൽ ടൗണിൽ നടത്തിയ പ്രതിഷേധ പ്രകടനത്തിനിടെ എസ്.എഫ്.ഐ യുടെ കൊടികളും ബോർഡുകളും നശിപ്പിച്ചു.