ടിപ്പറിടിച്ച് ബൈക്ക് യാത്രികന് പരിക്ക്

അഞ്ചൽ: ടിപ്പറും ബൈക്കും കൂട്ടിയിടിച്ചുണ്ടായ അപകടത്തിൽ ഒരാൾക്ക് പരിക്കേറ്റു. ബൈക്ക് യാത്രികൻ കടയ്ക്കൽ കുറ്റിക്കാട് ഹരിചന്ദനത്തിൽ അഭിഷേക് എസ്. പ്രസാദിനാണ് (21) പരിക്കേറ്റത്. കഴിഞ്ഞദിവസം വൈകുന്നേരം മൂന്നരയോടെ തടിക്കാട് ചന്തമുക്കിലായിരുന്നു അപകടം. മലമേൽ ഭാഗത്തുനിന്ന് ഇറക്കമിറങ്ങി വന്ന ബൈക്കും എതിർദിശയിലെത്തിയ ടിപ്പറും തമ്മിലാണ് ഇടിച്ചത്. ടിപ്പർ കോക്കാട് റോഡിലേക്ക് തിരിയവേയാണ്‌ കൂട്ടിയിടിച്ചതെന്ന് ദൃക്സാക്ഷികൾ പറഞ്ഞു. ഗുരുതര പരിക്കേറ്റ അഭിഷേകിനെ നാട്ടുകാർ അഞ്ചലിലെ സ്വകാര്യ ആശുപത്രിയിലും തുടർന്ന് വിദഗ്​ധ ചികിത്സക്കായി തിരുവനന്തപുരത്തെ സ്വകാര്യ ആശുപത്രിയിലും പ്രവേശിപ്പിച്ചു. ബൈക്ക് പൂർണമായും തകർന്നു. അഞ്ചൽ പൊലീസ്​ കേസെടുത്തു.