പ്രഭാത സവാരിക്കിടെ ബൈക്കിടിച്ച്​ മൂന്നുപേർക്ക് പരിക്ക്

കരുനാഗപ്പള്ളി: പ്രഭാത സവാരിക്കിടെ ബൈക്കിടിച്ച്​ ബൈക്ക് യാത്രക്കാരൻ ഉൾപ്പെടെ മൂന്നുപേർക്ക് പരിക്കേറ്റു. പ്രഭാത സവാരിക്കിറങ്ങിയ തഴവ കുതിരപ്പന്തി സരോവരത്തിൽ രത്നകുമാർ, ഓച്ചിറ സി.എച്ച്.സി ഹെൽത്ത് ഇൻസ്പക്ടർ കുതിരപ്പന്തി പുത്തൻതറയിൽ പി.സി മധുകുമാർ, ബൈക്ക് യാത്രക്കാരനായ ഓച്ചിറ മഠത്തിൽകാരാഴ്മ കാഞ്ഞിരത്തിൻ തറയിൽ വീട്ടിൽ ഉത്തമൻ എന്നിവർക്കാണ് പരിക്കേറ്റത്. ഉത്തമനെ ആലപ്പുഴ വണ്ടാനം മെഡിക്കൽ കോളജ്​ ആശുപത്രിയിലും രത്നകുമാറിനെ കറ്റാനത്ത് സ്വകാര്യ ആശുപത്രിയിലും പ്രവേശിപ്പിച്ചു. കഴിഞ്ഞ ദിവസം പുലർച്ചെ 5.40 ഓടെ വവ്വക്കാവ് - മണപ്പള്ളി റോഡിൽ കർത്തേരി ജങ്ഷന് സമീപമായിരുന്നു അപകടം.