സഹോദരങ്ങളെ വെട്ടിപ്പരിക്കേൽപിച്ചവർ പിടിയിൽ

കൊട്ടാരക്കര: പുത്തൂർമുക്ക് കൊടിമുകളിൽ വീട്ടിൽ സന്തോഷിനെയും സഹോദരൻ സുരേഷിനെയും വെട്ടിപ്പരിക്കേൽപിച്ച കേസിൽ രണ്ടുപേർ പിടിയിൽ.

പുത്തൂർമുക്ക് ശ്യാം ഭവനിൽ ശ്യാംമോൻ (34), സഹോദരൻ ശ്യാംലാൽ (30) എന്നിവരെയാണ് കൊട്ടാരക്കര പൊലീസ് അറസ്റ്റ് ചെയ്തത്. മന്ത്രവാദത്തെച്ചൊല്ലി അയൽവാസികൾ തമ്മിലുള്ള തർക്കമാണ് സംഘർഷത്തിന് കാരണമായതെന്ന് പൊലീസ് പറയുന്നു. പരിക്കേറ്റ സന്തോഷും സുരേഷും കൊട്ടാരക്കര താലൂക്ക് ആശുപത്രിയിൽ ചികിത്സയിലാണ്. സി.ഐ വി.എസ്. പ്രശാന്ത്, എസ്.ഐമാരായ ആൽബി എസ്. പുതുക്കാട്ടിൽ, സുദർശനൻ, രാജീവ്, സി.പി.ഒ സുരേഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.