കഴുതുരുട്ടിയാർ വറ്റി; മലയോര മേഖല കടുത്ത ജലക്ഷാമത്തിൽ
text_fieldsവെള്ളം വറ്റിയ കഴുതുരുട്ടിയാർ
പുനലൂർ: കിഴക്കൻ മലയോര മേഖലയിലെ പ്രധാന ജലസ്രോതസ്സായ കഴുതുരിട്ടിയാർ വറ്റി. മനുഷ്യർക്കൊപ്പം വന്യജീവികളും വെള്ളമില്ലാതെ ദുരിതത്തിലായി. സംസ്ഥാന അതിർത്തിയായ കോട്ടവാസലിൽനിന്ന് ഉത്ഭവിച്ച് തെന്മല ഡാമിൽ അവസാനിക്കുന്നതാണ് ഈ പുഴ.
ആര്യങ്കാവ്, തെന്മല പഞ്ചായത്തുകളിലുള്ളവരുടെ പ്രധാന ആശ്രയമായിരുന്നു ഇത്. കൂടാതെ ശെന്തുരുണി വന്യജീവി സങ്കേതത്തിലെയടക്കം കാട്ടുമൃഗങ്ങളും വെള്ളം കുടിച്ചിരുന്നത് ഈ പുഴയിൽ നിന്നായിരുന്നു. പുഴ വറ്റിയതോടെ തെന്മല പരപ്പാർ ഡാമിന്റെ പലഭാഗങ്ങളിലും ആനകളടക്കം വെള്ളം കുടിക്കാൻ കൂട്ടമായി എത്തുന്നു. പാലരുവി, നെടുമ്പാറ, ചേനഗിരി തുടങ്ങിയ തോടുകളിലെ വെള്ളം കഴുതുരുട്ടിയാറിലാണ് ഒഴുകിച്ചേരുന്നത്.
വനത്തിൽ നിന്നൊഴുകുന്ന ഈ പുഴകളെല്ലാം വറ്റിയതോടെ കഴുതുരുട്ടിയാറിലും വെള്ളമില്ലാതാകുകയായിരുന്നു. ചെറിയ തോതിൽ വെള്ളം ഒഴുകുന്നത് പലയിടത്തും ആളുകൾ പ്രാഥമിക ആവശ്യങ്ങൾക്ക് കെട്ടി നിർത്തിയിരിക്കുന്നതിനാൽ താഴേക്ക് വലിയതോതിൽ വെള്ളം ഒഴുകാനില്ലാതായി. ഇതോടെ ഡാമിലെ പ്രധാന നീരൊഴുക്കും നിലച്ചത് വെള്ളം താഴുന്നതിന് ഇടയാക്കുന്നു. ഈ ആറ്റിലെ വെള്ളം വേനൽക്കാലത്ത് ലഭിക്കാനാണ് കഴുതുരുട്ടിയിൽ തടയണ നിർമിച്ചത്. എന്നാൽ, ഇത്തവണ തടയണയിൽ വെള്ളം കെട്ടിനിർത്താൻ ബന്ധപ്പെട്ട അധികൃതർ തയാറാകാത്തതാണ് ആറിനെ വരൾച്ചയിലാക്കിയത്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.