നിറങ്ങളാൽ ലോകത്തിന്‍റെ സാക്ഷ്യം പറഞ്ഞ്​ ‘ടെസ്റ്റിമോണി’

കൊല്ലം: നിറച്ചാർത്തുകളിലൂടെ കഴിഞ്ഞുപോയ കാലത്തിന്​ സാക്ഷ്യമൊരുക്കുകയാണ്​ ‘ടെസ്റ്റിമോണി’. ചിത്രപ്രദർശനത്തിനപ്പുറം പുതുതലമുറക്ക്​ അന്യമായ ഗൃഹാതുരനിമിഷങ്ങൾക്ക്​ സാക്ഷ്യംപറയുന്ന കാഴ്​ചാനുഭവം സമ്മാനിക്കുകയാണ് ​ആശ്രാമം എയ്​റ്റ്​ പോയന്‍റ്​ ആർട് കഫെയിൽ ചിത്രകാരൻ ശ്രീകുമാർ വെൺപാലക്കര. പഴയ നാട്ടിൻപുറ കാഴ്ചകളും മലയാള സാഹിത്യ കൃതികളുടെ ദൃശ്യഭാഷ്യവും പ്രകൃതിയോടുള്ള സ്​നേഹവും കാലഘട്ടത്തിനോടുള്ള കലഹവും അങ്ങനെ പലവിധമാണ്​ അക്രിലിക്​ ചിത്രസൗന്ദര്യം. ‘ടെസ്റ്റിമോണി’ എന്ന​ പേരിൽ കഴിഞ്ഞ കാലത്തിന്‍റെ ദൃശ്യവിസ്മയം അവതരിപ്പിക്കുന്ന മൂന്ന്​ ചിത്രങ്ങളാണുള്ളത്​. ഒന്നിൽ കലപ്പയും നത്തക്കയും പാടവും നിറയുമ്പോൾ രണ്ടാമത്തേതിൽ പെട്രോമാക്സിന്‍റെ കുഞ്ഞുവെളിച്ചത്തിൽ തവളകളും കൂണുകളും വിരുന്നെത്തുന്നു. ഈ കൂട്ടത്തിലെ മൂന്നാം ചിത്രത്തിൽ തകർന്നുതരിപ്പണമായ നെയ്ത്തുമേഖലയുടെ നേർചിത്രമാണ്​. വേരുകൾ ദൃഢമെങ്കിലും ക്ഷയിക്കുന്ന ജനാധിപത്യത്തിൽ തളിരിലകളിലൂടെ പ്രതീക്ഷ ബാക്കിവെക്കുന്നുണ്ട്​.

മാതൃത്വവും കുട്ടികൾ നേരിടുന്ന ദുരന്തങ്ങളും പ്രകൃതിയും ഒ.എൻ.വി, കുമാരനാശാൻ കൃതികളും മുതൽ ജീവിതപങ്കാളി ശോഭയെ വരെയായി വർണകാഴ്ചയാകുന്ന 22 ചിത്രങ്ങളാണ്​ പ്രദർശനത്തിനുള്ളത്​. ചെറുപ്പകാലം മുതൽ ചിത്രകലയെ സ്​നേഹിച്ചിരുന്ന ശ്രീകുമാർ വെൺപാലക്കല 2003 മുതൽ കെ.എസ്​.ആർ.ടി.സിയിൽ പെയിന്‍റർ ആണ്​. ഈ വർഷം കൊല്ലം ഡിപ്പോയിൽ ചാർജ്​മാനായി വിരമിക്കുമ്പോൾ വിശ്രമജീവിതത്തിൽ പൂർണമായും വരയെ ചേർത്തുപിടിക്കാനാണ്​ തീരുമാനം. അതിന്‍റെ ഭാഗമായാണ്​ ആദ്യ ഏകാംഗ ചിത്രപ്രദർശനം സംഘടിപ്പിച്ചത്​. ജോലിത്തിരക്കിനിടയിൽ വരയിൽ നിന്ന്​ വിട്ടുനിന്ന ശ്രീകുമാറിനെ മക്കളായ അമ്പുവിന്‍റെയും ആർച്ചയുടെയും ചിത്രരചനപ്രിയമാണ്​ 2013മുതൽ തിരികെയെത്തിച്ചത്​. 2021 മുതലാണ്​ ക്രിയേറ്റീവ്​ ചിത്രരചനയിലേക്ക്​ കടന്നത്​. 12ഓളം ഗ്രൂപ്പ്​ പ്രദർശനങ്ങളുടെ ഭാഗമായിട്ടുണ്ട്​. തന്‍റെ ചിത്രങ്ങൾക്കിടയിൽ മകൾ ആർച്ചയുടെ ചാർക്കോൾ വരകൾക്കും ശ്രീകുമാർ ഇടം നൽകിയിട്ടുണ്ട്​. 19 വരെ ചിത്രപ്രദർശനം തുടരും.