കേരള പേപ്പർ കമ്പനി​ക്കൊപ്പം കുടുംബശ്രീ; പഴയപേപ്പറുകൾ ശേഖരിക്കും

കോട്ടയം: ഉൽപാദനത്തിനൊരുങ്ങുന്ന വെള്ളൂരിലെ കേരള പേപ്പര്‍ പ്രോഡക്ട് ലിമിറ്റഡിനായി​ പ​ഴയ പേപ്പറുകളുടെ ശേഖരണത്തിന്​ കുടുംബശ്രീ തുടക്കമിടുന്നു. സംസ്ഥാനത്തെ മുഴുവൻ വീടുകളിൽനിന്നും ​പഴയപേപ്പറുകൾ ശേഖരിച്ച്​ ​പൾപ്പ്​ നിർമിക്കാനായി കമ്പനിക്ക്​ ​കൈമാറാനാണ്​ പദ്ധതി. പഴയ പേപ്പറുകൾക്ക്​ ക്ഷാമം അനുഭവപ്പെടുന്ന സാഹചര്യത്തിലാണ്​ ശേഖരണചുമതല കുടുംബശ്രീയെ ഏൽപ്പിക്കാൻ സർക്കാർ തീരുമാനിച്ചത്​. വീടുകളിൽനിന്ന്​ കുടുംബശ്രീ ശേഖരിക്കുന്ന പത്രക്കടലാസ്​ അടക്കമുള്ള പഴയപേപ്പറുകൾ ജില്ല അടിസ്ഥാനത്തിൽ കമ്പനി ഏറ്റെടുക്കും. കുടുംബശ്രീയുമായി ബന്ധപ്പെട്ട്​ തദ്ദേശസ്ഥാപനങ്ങൾ കേന്ദ്രീകരിച്ച്​ പ്രവർത്തിക്കുന്ന ഹരിതകര്‍മ സേനക്ക്​ ഇതിന്‍റെചുമതല നൽകാനാണ്​ ആലോചന. കൃത്യമായ ഇടവേളകളില്‍ വീടുകളില്‍നിന്ന് പ്ലാസ്റ്റിക് മാലിന്യങ്ങള്‍ ശേഖരിച്ചുവരികയാണ്​ ​ ഹരിതകര്‍മ സേന. ഇതിനൊപ്പം പേപ്പർശേഖരണം കൂടി ആരംഭിക്കും. നിലവിൽ സംസ്ഥാനത്തെ ഭൂരിഭാഗം വീടുകളിലും ഹരിതകര്‍മ സേനാംഗങ്ങൾ എത്തുന്നതിനാൽ അനായാസം സംഭരണം നടത്താനാകുമെന്നാണ്​ കണക്കുകൂട്ടൽ. ഇതിനായി കൂടുതൽ പേരുടെ സാന്നിധ്യം ഉറപ്പാക്കുന്നതും ആലോചനയിലാണ്​. ഇവർക്ക്​ മറ്റൊരു വരുമാനമാർഗംകൂടിയായി ഇത്​ മാറും. ഇതുമായി ബന്ധ​​പ്പെട്ട്​ കേരള പേപ്പര്‍ പ്രോഡക്ട് ലിമിറ്റഡും(കെ.പി.പി.എൽ) കുടുംബശ്രീയുമായി രണ്ടുഘട്ട ചർച്ചകൾ പൂർത്തിയായി. അടുത്തയാഴ്ച നടക്കുന്ന യോഗത്തിൽ അന്തിമധാരണയാകും. തുടർന്ന്​ അടുത്തമാസം ആദ്യത്തോടെ ​പേപ്പറുകളുടെ ശേഖരണം ആരംഭിക്കാനാണ്​ ധാരണ. പണം നൽകിയാകും ​വീടുകളിൽനിന്ന്​ പഴയകടലാസുകൾ ശേഖരിക്കുക. ഇതിനുള്ള തുകക്കൊപ്പം കൈകാര്യ ചെലവും പ്രതിഫലവും കുടുംബശ്രീക്ക്​ കെ.പി.പി.എൽ കൈമാറും. പ്ലാസ്റ്റിക്​ നിരോധത്തിന്‍റെ ഭാഗമായി പേപ്പർ ബാഗുകൾ വലിയതോതിൽ ഉൽപ്പാദിപ്പിച്ച്​ തുടങ്ങിയതോടെ പഴയകടലാസുകൾക്ക്​ ആവശ്യം വർധിച്ചു. ഇതാണ്​ ക്ഷാമത്തിന്​ കാരണം. കുടുംബശ്രീയുമായുള്ള സഹകരണത്തിലൂടെ ഈ പ്രതിസന്ധി മറികടക്കാനാകുമെന്നാണ്​ ​കമ്പനിയുടെ വിലയിരുത്തൽ. മരം ഉപയോഗിച്ചും പഴയ പേപ്പറുകൾ ഉപയോഗിച്ചും രണ്ടു തരത്തിലാണ്​ പൾപ്പുണ്ടാക്കുന്നത്​. ഇത്​ രണ്ടും കൂട്ടികലർത്തിയാണ്​ പേപ്പർ നിർമിക്കുന്നത്​. അടുത്തിടെ പൾപ്പിനാവശ്യമായ മരം ലഭ്യമാക്കാൻ വനംവകുപ്പുമായി ധാരണയായിരുന്നു. കമ്പനിക്ക്​ അടുത്ത രണ്ടുവർഷത്തേക്ക് ആവശ്യമുള്ള മരങ്ങൾ കേരളത്തിന്‍റെ വിവിധ വനമേഖലകളിലുണ്ടെന്നും കണ്ടെത്തിയിരുന്നു. മരത്തിന്​ തുക ഈടാക്കില്ലെങ്കിലും ചെലവ് കമ്പനി വഹിക്കണമെന്നാണ്​ കരാർ. അടുത്തഘട്ടമായി വനമേഖലകളിൽ മുളവെച്ചുപിടിപ്പിക്കുന്നതും ആലോചനയിലാണ്​. നഷ്ടത്തിലായതിനെ തുടര്‍ന്ന് കേന്ദ്ര സര്‍ക്കാര്‍ കൈയൊഴിഞ്ഞ കോട്ടയം ​വെള്ളൂരിലെ ഹിന്ദുസ്ഥാന്‍ ന്യൂസ് പ്രിന്‍റ് ലിമിറ്റഡ് സംസ്ഥാന സര്‍ക്കാര്‍ ഏറ്റെടുത്തത് കേരള പേപ്പര്‍ പ്രൊഡക്ട് ലിമിറ്റഡാക്കി മാറ്റുകയായിരുന്നു. ഇതിന്‍റെ പ്രവർത്തനോദ്ഘാടനം വ്യാഴാഴ്ച മുഖ്യമന്ത്രി പിണറായി വിജയൻ നിർവഹിക്കും. -- എബി തോമസ്​