പാതയിരട്ടിപ്പിക്കൽ: സുരക്ഷ പരിശോധന നാളെ; സ്‌പീഡ്‌ ട്രയൽ നടത്തും

കോട്ടയം: പാതയിരട്ടിപ്പിക്കൽ ജോലികളുടെ പൂർത്തീകരണത്തിന്​ മുന്നോടിയായി ചിങ്ങവനം-ഏറ്റുമാനൂർ പാതയിൽ തിങ്കളാഴ്ച സുരക്ഷ പരിശോധന നടക്കും. ബംഗളൂരുവിൽനിന്നുള്ള കമീഷൻ ഓഫ്‌ റെയിൽവേ സേഫ്‌റ്റി (സി.ആർ.എസ്) അഭയ്‌കുമാർ റായ്​യുടെ നേതൃത്വത്തിലാണ്​ പരിശോധന. രണ്ടു ഘട്ടമായാണ്​ പരിശോധന. ഇത്​ വിജയമായാല്‍ ഈമാസം 28 മുതല്‍ പുതിയ പാതയിലൂടെ ട്രെയിന്‍ ഓടിത്തുടങ്ങും. പ്രത്യേക മോട്ടോർ ട്രോളിയിൽ യാത്ര ചെയ്താവും കമീഷണർ പരിശോധിക്കുക. ഏറ്റുമാനൂരിൽനിന്ന്​ രാവിലെ പരിശോധന ആരംഭിക്കും. ​പാതയിലൂടെ കടന്നുപോകുന്നതിനൊപ്പം ഒരോ സ്ഥലവും വിശദമായി പരിശോധിക്കും. പാളം, സ്ലീപ്പറുകൾ, അതുറപ്പിച്ച തറ, വശത്തെ കരിങ്കൽക്കെട്ട്​, മേൽപാലങ്ങൾ, പാലങ്ങൾ എന്നിവ പരിശോധിക്കും. ​രണ്ടാംഘട്ടമായി പാതയിൽ സ്പീഡ് ട്രയൽ നടത്തും. പുതുതായി നിർമിച്ച പാതയിലൂടെ 120 കിലോമീറ്റർ വേഗത്തിൽ ഇലക്ട്രിക് എൻജിൻ ഓടിച്ചാകും സ്‌പീഡ്‌ ട്രയൽ. എൻജിനും ഒരു ബോഗിയും ഉൾപ്പെടുന്ന യൂനിറ്റാകും ഇതിനായി ഉപയോഗിക്കുക. ഏറ്റുമാനൂർ പാറോലിക്കൽ മുതൽ കോട്ടയം വരെ, കോട്ടയം-ചിങ്ങവനം എന്നിങ്ങനെ രണ്ടു ഭാഗങ്ങളായിട്ടാകും സ്പീഡഡ്​​ ട്രയൽ. റെയിൽവേയു​ടെ സുരക്ഷ, സാ​ങ്കേതിക വിദഗ്​ധർ ട്രെയിനിൽ സഞ്ചരിച്ച്​ പുതിയ പാളത്തിലെ ചലനങ്ങൾ വിലയിരുത്തും. ഇതിൽ ​സേഫ്റ്റി കമീഷണർ തൃപ്തി രേഖപ്പെടുത്തിയാൽ തുടർന്നുള്ള ദിവസങ്ങളിൽ സിഗ്നൽ ബന്ധിപ്പിക്കുന്ന ജോലികൾ നടക്കും. ഈ ദിവസങ്ങളിൽ പകൽ​ കോട്ടയം വഴിയുള്ള ട്രെയിൻ സർവിസ് പൂർണമായും നിർത്തിവെക്കും. ഈ മാസം 28ന്​ ഗതാഗതം പൂർണമായി തടഞ്ഞ്​ ​സിഗ്നലിങ്ങുമായി ബന്ധപ്പെട്ട അന്തിമ ജോലികൾ പൂർത്തിയാക്കും. 10 മണിക്കൂറാണ് ഇതിനായി പ്രതീക്ഷിക്കുന്നത്​. ഏറ്റുമാനൂർ- ചിങ്ങവനം റെയിൽവേ സ്റ്റേഷനുകൾക്ക് ഇടയിൽ 16.5 കിലോമീറ്ററായിരുന്നു ഇരട്ടപ്പാത പൂർത്തിയാകാനുണ്ടായിരുന്നത്​. ഇതു പൂർ‍ത്തിയായാൽ മംഗളൂരു-തിരുവനന്തപുരം റൂട്ടിലെ 634 കിലോമീറ്റർ പാത (കോട്ടയം വഴി) പൂർണമായും വൈദ്യുതീകരിച്ച ഇരട്ടപ്പാതയായി മാറും. പാത ഇരട്ടിപ്പിക്കലിനോടൊപ്പം കോട്ടയം റെയിൽവേ സ്റ്റേഷന്‍റെ നവീകരണവും പുരോഗമിക്കുന്നുണ്ട്‌. പുതിയ പ്ലാറ്റ്‌ഫോം അടക്കമുള്ളവയുടെ നിർമാണമാണ്​ നടക്കുന്നത്​. പാതിയിരട്ടിപ്പിക്കൽ ജോലികളുടെ ഭാഗമായി കോട്ടയം വഴിയുള്ള 21 ട്രെയിനുകളാണ്​ ​വിവിധ ദിവസങ്ങളിലായി ഈ മാസം 29 വരെ റദ്ദാക്കിയിരിക്കുന്നത്​. വിവിധ ട്രെയിനുകൾ ആലപ്പുഴ വഴി തിരിച്ചുവിടുമെന്നും റെയിൽവേ അറിയിച്ചിട്ടുണ്ട്​.