ചട്ടവിരുദ്ധമായി കൗൺസിൽ യോഗം; നിർത്തിവെപ്പിച്ച്​ എൽ.ഡി.എഫ്​ കൗൺസിലർമാർ

കോട്ടയം: ചട്ടവിരുദ്ധമായി കൗൺസിൽ യോഗം വിളിച്ചതിനെച്ചൊല്ലി നഗരസഭയിൽ എൽ.ഡി.എഫ്​ കൗൺസിലർമാരുടെ പ്രതിഷേധവും ഉപരോധവും. മൂന്നു ​പ്രവൃത്തിദിവസങ്ങൾക്കുമുമ്പ്​ കൗൺസിൽ നോട്ടീസ്​ നൽകണമെന്ന ചട്ടംലംഘിച്ച്​ തലേദിവസം മാ​ത്രമാണ്​ കൗൺസിലർമാർക്ക്​ നോട്ടീസ്​ നൽകിയത്. ഇതായിരുന്നു ബഹളത്തിന്​ വഴിവെച്ചത്​. ബഹളം രൂക്ഷമായതോടെ ​അധ്യക്ഷ ബിൻസി സെബാസ്റ്റ്യൻ കൗൺസിൽ ഹാളിൽനിന്ന്​ ഇറങ്ങിപ്പോയി. സെക്രട്ടറി ഇൻ ചാർജ്​ എത്താതെ യോഗം തുടങ്ങാനുള്ള അധ്യക്ഷയുടെ നീക്കം ആദ്യമേ പ്രതിപക്ഷനേതാവ്​ അഡ്വ. ഷീജ അനിൽ തടഞ്ഞു. സെക്രട്ടറി വന്നിട്ടുമതി യോഗമെന്ന്​ ഷീജ പറഞ്ഞതോടെ അധ്യക്ഷ ഫോണിൽ അവരെ ബന്ധപ്പെട്ടു. അൽപസമയം കഴിഞ്ഞ്​ സെക്രട്ടറി ഇൻ ചാർജ്​ അസി. എക്​സിക്യൂട്ടിവ്​ എൻജിനീയർ അനിലയെത്തി ഇരിപ്പിടത്തിലിരുന്നതോടെ മാത്രമാണ്​ എൽ.ഡി.എഫ്​ കൗൺസിലർമാർ ശാന്തരായത്​​. തുടർന്ന്​ അജണ്ട വായിക്കാനുള്ള ശ്രമം തുടങ്ങിയപ്പോൾ​ വീണ്ടും ഷീജ എഴുന്നേറ്റു. ചട്ടവിരുദ്ധമായാണ്​ നോട്ടീസ്​ നൽകിയതെന്നും അതിനാൽ കൗൺസിൽ യോഗം നടത്താനാവില്ലെന്നും റദ്ദാക്കണമെന്നും ഷീജ ആവശ്യപ്പെട്ടു. നോട്ടീസ്​ നൽകുന്ന ദിവസവും കൗൺസിൽ നടക്കുന്ന ദിവസവും ഒഴികെ മൂന്നു പ്രവൃത്തി ദിനങ്ങൾക്കുമുമ്പ്​ നോട്ടീസ്​ നൽകണമെന്നാണ്​ മുനിസിപ്പൽ ചട്ടം. അല്ലെങ്കിൽ ഒറ്റ അജണ്ടവെച്ച്​ അടിയന്തര കൗൺസിൽ ചേരാം. എന്നാൽ, കഴിഞ്ഞ കൗൺസിലിൽ ബാക്കിയായ ഏഴു അജണ്ടകളും ഒരു സപ്ലിമെന്‍ററി അജണ്ടയുമാണ്​ യോഗത്തിനുവെച്ചിരുന്നത്​. ഇത്​ ശരിയാണോ എന്ന്​ സെക്രട്ടറി പറയണമെന്ന്​ ഷീജ ആവശ്യപ്പെട്ടു. തനിക്കും തിങ്കളാഴ്​ച വൈകീട്ട്​ മാത്രമാണ്​ നോട്ടീസ്​ കിട്ടിയതെന്നും അത്​ ചട്ടവിരുദ്ധമാണെന്നും സെക്രട്ടറി ഇൻ ചാർജ്​ സമ്മതിച്ചതോടെ എൽ.ഡി.എഫ്​ കൗൺസിലർമാർ ഒന്നടങ്കം എഴുന്നേറ്റ്​ പ്രതിഷേധവുമായി അധ്യക്ഷയെ സമീപിച്ചു. അധ്യക്ഷ സംസാരിക്കാനെഴുന്നേറ്റെങ്കിലും സമ്മതിച്ചില്ല. യോഗം റദ്ദാക്കി ഇറങ്ങിപ്പോകാൻ ഷീജ ആവശ്യപ്പെട്ടതോടെ കൗൺസിൽ ഹാളിൽനിന്നിറങ്ങി ചേംബറിലേക്കുപോയ അധ്യക്ഷ തുടർന്ന്​ കാറിൽകേറി മടങ്ങുകയും ചെയ്തു. ഇതോടെ എൽ.ഡി.എഫ്​ അംഗങ്ങളും ഇറങ്ങിപ്പോയി. അധ്യക്ഷയുടെ കാബിന്​ മുന്നിൽ കുത്തിയിരുന്ന്​ ഏറെനേരം മു​​ദ്രാവാക്യം വിളിച്ചു. നഗരസഭയിൽ അധ്യക്ഷയുടെ ഏകാധിപത്യഭരണം -അഡ്വ. ഷീജ അനിൽ കോട്ടയം: അധ്യക്ഷയുടെ ഏകാധിപത്യ ഭരണമാണ്​ നഗരസഭയിൽ നടക്കുന്നതെന്ന്​ പ്രതിപക്ഷ നേതാവ്​ അഡ്വ. ഷീജ അനിൽ ആരോപിച്ചു. കൗൺസിൽ യോഗത്തിലെടുക്കുന്ന തീരുമാനങ്ങളല്ല മിനിറ്റ്​സിൽ വരുന്നത്​. അധ്യക്ഷയും സെക്​ഷൻ ക്ലർക്കും ചേർന്നുള്ള അഴിമതിയാണ്​ നടക്കുന്നത്​. തലേദിവസം കൗൺസിൽ നോട്ടീസ്​ നൽകിയതിനെക്കുറിച്ച്​ അന്വേഷിച്ചപ്പോൾ, ഇടതുപക്ഷത്തോട്​ ആലോചിച്ച്​ കൗൺസിൽ യോഗം തീരുമാനിക്കാനാകില്ല എന്നായിരുന്നു​ മറുപടി. അഴിമതി നടത്തുന്നതിനാണ്​ നോട്ടീസ്​ നേരത്തേ നൽകാതിരുന്നത്​. കുറച്ചുകാലമായി വിജിലൻസ്​ കയറിയിറങ്ങുകയാണ്​ നഗരസഭയിലെന്നും ഷീജ അനിൽ കുറ്റപ്പെടുത്തി. വൈസ്​ ചെയർമാ‍ൻെറ അധ്യക്ഷതയിലെടുത്ത കൗൺസിൽ തീരുമാനങ്ങൾ പോലും ചെയർപേഴ്​സൻ നടപ്പാക്കുന്നില്ലെന്ന്​ മറ്റു കൗൺസിലർമാർ പറഞ്ഞു. പടം: DP