ലാറ്റക്‌സിന്‍റെ​ ഇറക്കുമതിച്ചുങ്കം ഒഴിവാക്കാൻ നീക്കം; കേ​ന്ദ്രം റിപ്പോർട്ട്​ തേടി

കോട്ടയം: ലാറ്റക്സിന്‍റെ ഇറക്കുമതിച്ചുങ്കം ഒഴിവാക്കണമെന്ന വ്യവസായികളുടെ ആവ​ശ്യത്തിൽ അനുകൂല നീക്കങ്ങളുമായി കേന്ദ്ര വാണിജ്യ മന്ത്രാലയം. കേന്ദ്ര വാണിജ്യ വ്യവസായ മന്ത്രി പീയൂഷ് ഗോയല്‍ റബര്‍ ബോര്‍ഡിനോട് റിപ്പോർട്ട്​ തേടി​. കഴിഞ്ഞദിവസം കൊച്ചിയിൽ പീയൂഷ് ഗോയല്‍ വിളിച്ച റബര്‍ ബോര്‍ഡ് ഉന്നതരുടെയും ഓട്ടോമോട്ടീവ് ടയർ മാനുഫാക്‌ചേഴ്‌സ്‌ അസോസിയേഷൻ (ആത്മ) അടക്കമുള്ള സംഘടന പ്രതിനിധികളുടെയും യോഗത്തിൽ ലാറ്റക്‌സിന്‍റെ ഇറക്കുമതിച്ചുങ്കം എടുത്തുമാറ്റണമെന്ന നിർദേശം ഉയർന്നിരുന്നു. ആദ്യഘട്ടമായി നികുതി ഒഴിവാക്കണമെന്ന ആവശ്യമാണ്​ ഉയർന്നത്​. ഇതിനു പിന്നാലെയാണ്​ ഈ വിഷയത്തിൽ വാണിജ്യ മന്ത്രി റബര്‍ ബോര്‍ഡിനോട് റിപ്പോര്‍ട്ട് തേടിയത്​. വിവിധ രാജ്യങ്ങളുടെ ഇറക്കുമതിച്ചുങ്കത്തിന്​ അംഗീകാരം നൽകുന്ന ലോക വ്യാപാര സംഘടനയുടെ 12ാം മന്ത്രിതല സമ്മേളനം ജൂണ്‍ 12 മുതല്‍ ജനീവയില്‍ നടക്കാനിരിക്കെ, മന്ത്രി റിപ്പോർട്ട്​ ആവശ്യപ്പെട്ടത്​​ റബർ കർഷക മേഖലയിൽ കടുത്ത ആശങ്കയാണ്​ സൃഷ്ടിച്ചത്. ലാറ്റക്‌സ് വ്യവസായ അസംസ്‌കൃത വസ്തുക്കളുടെ ലിസ്റ്റിൽ ഉൾ​​പ്പെട്ടിട്ടില്ലാത്തതിനാൽ നിലവിൽ​ 70 ശതമാനമാണ്​ ചുങ്കം. രാജ്യത്തെ കർഷകർക്ക്​ മെച്ചപ്പെട്ട വില ഉറപ്പാക്കാൻ ലക്ഷ്യമിട്ടാണ്​ ഉയർന്ന ചുങ്കം​. ഇത്​ ഒഴിവാക്കിയാൽ കുറഞ്ഞ ചെലവിൽ വലിയതോതിൽ ലാറ്റക്സ്​ രാജ്യത്തേക്ക്​ ഇറക്കുമതി ചെയ്യാനാകും. ഇത്​ വിലയിടിവിലേക്ക്​ നയിക്കാം. ഇറക്കുമതിയേക്കാൾ ഇത്​ ചൂണ്ടിക്കാട്ടി ലാറ്റക്സിന്‍റെ വിലയിടിക്കാനാണ്​ വ്യവസായികൾ ലക്ഷ്യമിടുന്നതെന്ന്​ കർഷക സംഘടനകൾ ചൂണ്ടിക്കാട്ടുന്നു. തകര്‍ന്നടിഞ്ഞ റബര്‍ മേഖല കരകയറാന്‍ ശ്രമിക്കുന്നതിനിടെയുള്ള ഇത്തരം നീക്കങ്ങൾ കടുത്ത പ്രതിസന്ധിയാകും സൃഷ്ടിക്കുകയെന്ന്​ കർഷകർ പറയുന്നു. ഇത്തരം നീക്കങ്ങൾക്ക്​ റബർ ബോര്‍ഡ് കൂട്ടുനില്‍ക്കുകയാണെന്ന്​ ഇൻഫാം ആരോപിച്ചു. സാഹചര്യം ബോധപൂർവം സൃഷ്ടിക്കപ്പെട്ടതാണെന്ന് വ്യക്തമാണെന്ന്​ ഇന്‍ഫാം ദേശീയ സെക്രട്ടറി ജനറല്‍ അഡ്വ. വി.സി. സെബാസ്റ്റ്യന്‍ പറഞ്ഞു. ലാറ്റക്‌സ് ഉൽപന്നങ്ങള്‍ കയറ്റുമതി ചെയ്യുന്നവര്‍ക്ക് അഡ്വാന്‍സ് ലൈസന്‍സ് സ്‌കീമിലൂടെ നികുതിരഹിത ലാറ്റക്‌സ് ഇറക്കുമതിക്ക് ഇപ്പോൾ അവസരമുണ്ട്​. ഇറക്കുമതിയുടെ അനുപാതമനുസരിച്ച് നിബന്ധനകള്‍ക്ക് വിധേയമായി നിശ്ചിത സമയപരിധിക്കുള്ളില്‍ ഉൽപന്നങ്ങളുടെ കയറ്റുമതി നടത്തണമെന്ന വ്യവസ്ഥ പാലിക്കു​ന്നവർക്കാണ്​ ഈ ആനുകൂല്യം. ഇത്​ നിലനിൽക്കെയാണ്​, ചുങ്കംതന്നെ ഒഴിവാക്കാനുള്ള ശ്രമങ്ങളെന്നും വിവിധ സംഘടനകൾ പറയുന്നു. ഇന്ത്യയില്‍ ലാറ്റക്‌സ് ഉൽപാദനം ഉപഭോഗത്തേക്കാള്‍ കൂടുതലാണ്​. രാജ്യത്ത്​ 1,09,250 മെട്രിക് ടണ്‍ ഉപഭോഗമുള്ളപ്പോള്‍ ഉൽപാദനം 2,40,000 മെട്രിക് ടണ്ണാണെന്നും ഇവർ ചൂണ്ടിക്കാട്ടുന്നു.