വൈവിധ്യങ്ങൾ ചോദ്യം ചെയ്യപ്പെടുന്ന കാലം - സാദിഖലി തങ്ങൾ

കോട്ടയം: മതങ്ങൾ മുന്നോട്ടുവെക്കുന്ന സ്​നേഹം, കരുണ തുടങ്ങിയ മൂല്യങ്ങളെ പ്രയോഗവത്​കരിച്ച്​ മുന്നോട്ടുപോവാൻ നാമോരോരുത്തർക്കും കഴിയണമെന്ന്​ മുസ്​ലിംലീഗ്​ സംസ്ഥാന പ്രസിഡന്‍റ്​ സാദിഖലി ശിഹാബ്​ തങ്ങൾ. ജില്ല പര്യടന സംഗമങ്ങളുടെ ഭാഗമായി കോട്ടയത്ത്​ നടത്തിയ സുഹൃദ്‌സദസ്സിൽ സംസാരിക്കുകയായിരുന്നു അദ്ദേഹം. ജനാധിപത്യം പൂർണമാവണമെങ്കിൽ വൈവിധ്യങ്ങൾ വേണം. വൈവിധ്യങ്ങൾ ചോദ്യം ചെയ്യപ്പെടുന്ന കാലമാണിത്​. കേരളം എല്ലാത്തിനും മാതൃകയാണ്​. വിദ്യാഭ്യാസപരമായി മുന്നിൽ നിൽക്കുന്ന നാട്ടിൽ വർഗീയ- വിഭാഗീയ പ്രചാരണങ്ങൾ നടന്നാൽ ഏറെ അപകടമാണ്​. അത്​ തിരിച്ചറിഞ്ഞ്​ മുൻകരുതലെടുക്കണം. മതസൗഹൃദമല്ല, മാനവസൗഹാർദമാണ്​ കാത്തുസൂക്ഷിക്കേണ്ടതെന്ന ആശയമാണ്​​ സുഹൃദ്‌സദസ്സിൽ മതപണ്ഡിതരടക്കം മുന്നോട്ടുവെച്ചതെന്നും അദ്ദേഹം പറഞ്ഞു. മലയാളികൾക്കിടയിലെ ഐക്യത്തിന്‍റെയും സാഹോദര്യത്തിന്‍റെയും സംസ്കാരം നഷ്ടപ്പെടാതിരിക്കാനുള്ള ശ്രമമാണ്​ സുഹൃദ്‌സദസ്സുകളിലൂടെ ലക്ഷ്യമിടുന്നതെന്ന് ദേശീയ ജനറല്‍ സെക്രട്ടറി പി.കെ.​ കുഞ്ഞാലിക്കുട്ടി പറഞ്ഞു. സംസ്​ഥാന ജന. സെക്രട്ടറി അഡ്വ. പി.എം.എ. സലാം, എം.എൽ.എമാരായ തിരുവഞ്ചൂർ രാധാകൃഷ്ണൻ, മോൻസ് ജോസഫ്, മുൻ മന്ത്രി കെ.സി. ജോസഫ്, അസീസ് ബഡായിൽ തുടങ്ങിയവർ വാർത്താസമ്മേളനത്തിൽ പങ്കെടുത്തു.