അഗതിമന്ദിരങ്ങളിലെ അന്തേവാസികൾക്ക് പെൻഷനില്ല; നിർദേശം സർക്കാർ തള്ളി

കോട്ടയം: അനാഥ-അഗതി മന്ദിരങ്ങളിലെ മുതിർന്ന പൗരൻമാരുടെ ക്ഷേമപെൻഷൻ പുനഃസ്ഥാപിക്കണമെന്ന ഓർഫനേജ്​ കൺട്രോൾ ബോർഡി​ന്‍റെ ആവശ്യം സർക്കാർ തള്ളി. കഴിഞ്ഞവർഷം ജൂലൈയിലാണ്​ അനാഥ-അഗതി-വൃദ്ധ മന്ദിരങ്ങളിലെ മുതിർന്ന അന്തേവാസികൾക്കുള്ള ക്ഷേമപെൻഷൻ റദ്ദ് ചെയ്ത ധനവകുപ്പ്​ ഉത്തരവിറക്കിയത്​. ഇതിനൊപ്പം ശാരീരിക വൈകല്യമുള്ളവർ, മാനസിക വെല്ലുവിളി നേരിടുന്നവർ എന്നിവർക്കുള്ള പെൻഷനുകളും നിലച്ചു. ഒ​റ്റപ്പെടലിന്‍റെ കാലത്ത്​ ക്ഷേമപെൻഷൻ കൈകളിലെത്തുന്നത്​ അന്തേവാസികൾക്ക്​ ആഹ്ലാദനിമിഷങ്ങളായിരുന്നു സമ്മാനിച്ചിരുന്നത്​. വർഷങ്ങളായി ലഭിച്ചിരുന്ന ആനുകൂല്യങ്ങൾ ഇല്ലാതായത്​ ​ പ്രതിഷേധങ്ങൾക്കും ഇടയാക്കി. ഇതോടെയാണ്​ നിലവിലെ സാഹചര്യങ്ങൾ ചൂണ്ടിക്കാട്ടി തീരുമാനം പുനഃപരിശോധിക്കണമെന്നാവശ്യപ്പെട്ട്​ ഓർഫനേജ്​ കൺട്രോൾ ബോർഡ്​ സർക്കാറിനെ സമീപിച്ചത്​. എന്നാൽ, പെൻഷൻ നൽകാനാവില്ലെന്ന്​ സാമൂഹ്യനീതി വകുപ്പ്​ കഴിഞ്ഞ ദിവസം ബോർഡിനെ അറിയിച്ചു. അന്തേവാസികൾ അതത്​ സ്ഥാപനങ്ങളുടെ സംരക്ഷണയിലാണ്​ ജീവിക്കുന്നതെന്നും അവരുടെ പൂർണ സംരക്ഷണചുമതല ആ സ്ഥാപനങ്ങൾക്കാണെന്നും സാമൂഹ്യനീതി വകുപ്പിന്‍റെ ഉത്തരവിൽ പറയുന്നു. ഇത്തരം സ്ഥാപനങ്ങളിൽ അർഹതപ്പെട്ടവക്ക്​ സർക്കാർ സാമ്പത്തിക സഹായം നൽകുന്നുണ്ടെന്നും ഇതിൽ ചൂണ്ടിക്കാട്ടിയിട്ടുണ്ട്​. എന്നാൽ, സംസ്ഥാനത്തെ ഭൂരിഭാഗം സ്ഥാപനങ്ങളും സർക്കാർ ഗ്രാന്‍റിന്​ പുറത്താണെന്ന്​ ഓർഫനേജ്​ കൺട്രോൾ ബോർഡി​ന്‍റെ കണക്കുകളിൽതന്നെ പറയുന്നു. ബോർഡി​ന്‍റെ കണക്കനുസരിച്ച്​ വയോജനങ്ങളെ സംരക്ഷിക്കുന്ന 626 കേന്ദ്രങ്ങളാണ്​ സംസ്ഥാനത്തുള്ളത്​. ഇവയിൽ 182 സ്ഥാപനങ്ങൾക്ക്​ മാത്രമാണ്​ ഗ്രാന്‍റുള്ളത്​. മറ്റ്​ സ്ഥാപനങ്ങൾക്ക്​ ആനുകൂല്യമില്ല​. ഇതുകൂടികണക്കിലെടുത്തായിരുന്നു ബോർഡ്​ സർക്കാറിനെ സമീപിച്ചത്​. അഗതിമന്ദിരങ്ങളിലെ മുതിർന്ന പൗരൻമാർക്ക് സാമൂഹ്യക്ഷേമ പെൻഷൻ അനുവദിച്ച്​ 2016ലാണ് സർക്കാർ ഉത്തരവിട്ടത്​. ഇതിന്‍റെ തുടർച്ചയായി​ പെൻഷൻ വിതരണം ആരംഭിച്ചെങ്കിലും പിന്നീട്​ താളംതെറ്റി. മാസങ്ങളോളം പെൻഷൻ കുടിശ്ശികയായി. ഇതിനിടെയാണ്​ ആനുകൂല്യം റദ്ദാക്കി സർക്കാർ ഉത്തരവിട്ടത്​. പെൻഷൻ നിലച്ചത്​ ഇത്തരം സ്ഥാപനങ്ങൾക്ക്​ കടുത്ത പ്രതിസന്ധിയാണ്​ സൃഷ്ടിച്ചതെന്ന്​ ഓർഫനേജ്​ കൺട്രോൾ ബോർഡ്​ പറയുന്നു. ഇതിനൊപ്പം ക്ഷേമസ്ഥാപനങ്ങൾക്കുള്ള ഗ്രാന്‍റ്​തുക പ്രതിമാസം ഒരു താമസക്കാരന്​ 1600 രൂപയായി ഉയർത്തണമെന്ന്​ ബോർഡ്​ നിർദേശവും സാമൂഹ്യനീതി വകുപ്പ്​ തള്ളി. സർക്കാറിന്‍റെ സാമ്പത്തിക പ്രതിസന്ധിയാണ്​ ഇതിനുകാരണമായി ചൂണ്ടിക്കാട്ടുന്നത്​. നിലവിൽ 1100 രൂപയാണ്​ സർക്കാർ അനുവദിക്കുന്നത്​. -- എബി തോമസ്​