8.80 ലക്ഷത്തിന് ഇഷ്ടവാഹന നമ്പർ സ്വന്തമാക്കി

കോട്ടയം: ഇഷ്ടവാഹന നമ്പർ 8.80 ലക്ഷം രൂപയുടെ ലേലത്തിലൂടെ​ സ്വന്തമാക്കി വാഹന ഉടമ. കെ.എൽ 05 എ.വൈ 7777 എന്ന നമ്പറാണ് 47 ലക്ഷം രൂപ വിലയുള്ള ആഡംബര കാറിനായി അയർക്കുന്നം സ്വദേശി ടോണി വർക്കിച്ചൻ റെക്കോഡ് ലേലത്തുകക്ക്​ സ്വന്തമാക്കിയത്. ചിങ്ങവനം സ്വദേശി ആകാശ് പി.എബ്രഹാമും ഇതേ നമ്പറിനായി കോട്ടയം ആർ.ടി ഓഫിസിനെ സമീപിച്ചതോടെയാണ് ലേലത്തിലേക്ക് കടന്നത്. സർക്കാർ 50,000 രൂപയാണ് നമ്പറിന്‍റെ തുക നിശ്ചയിച്ചത്. തുക ഓൺലൈനായി അടച്ച് ബുക്കിങ്​ ചെയ്തശേഷമാണ് ലേലം ആരംഭിച്ചത്. ലേലത്തിൽ 7,83,000 രൂപ വരെ ആകാശ് വിളിച്ചു. 8,30,000 രൂപക്ക്​ വിളിച്ച് ടോണി വർക്കിച്ചൻ ലേലം ഉറപ്പിച്ചു. ബുക്കിങ്ങിനായി അടച്ച തുക കൂടിയായപ്പോൾ നമ്പറിന്‍റെ മൂല്യം 8,80,000 രൂപയായി.