യുവാവിനെ അക്രമിച്ച്​ മൊബൈലും പണവും തട്ടിയ നാലുപേർ അറസ്​റ്റിൽ

കോട്ടയം: യുവാവിനെ അക്രമിച്ച്​ മൊബൈൽ ഫോണും പണവും തട്ടിയെടുത്ത നാലുപേർ അറസ്​റ്റിൽ. പൂവൻതുരുത്ത് കാന്തിപ്പള്ളി തോട്ടത്തിൽ ബിജു (42), പനച്ചിക്കാട് പാറയിൽ ജിഷ്‌ണു (25), പൂവൻതുരുത്ത് പുത്തൻപറമ്പിൽ വിഷ്‌ണു (22) , പള്ളം തുണ്ടിയിൽ സന്ദീപ് (26) എന്നിവരെയാണ് കോട്ടയം ഈസ്​റ്റ്​ സ്​റ്റേഷൻ ഇൻസ്‌പെക്‌ടർ പി.ടി. ബിജോയിയുടെ നേതൃത്വത്തിലുള്ള സംഘം പിടികൂടിയത്​. കഴിഞ്ഞ 22ന് പൂവൻതുരുത്ത് വ്യവസായ മേഖലയിലെ ക്രഷർ ജീവനക്കാരനായ അനൂപിനെ ആക്രമിച്ച്​ പണവും മൊബൈൽ ഫോണും കവർന്ന കേസിലാണ് അറസ്​റ്റ്​. വ്യവസായ മേഖലയിലെ ഇതര സംസ്ഥാന തൊഴിലാളികളെ ആക്രമിച്ച്​ പണവും മൊബൈൽ ഫോണും കവരുന്നതായിരുന്നു പ്രതികളുടെ രീതി. സംഘം പലതവണ ഇത്​ ആവർത്തിച്ചിരുന്നു. സമാനരീതിയിൽ ഇവിടെ എത്തിയ സംഘം ഇതര സംസ്ഥാന തൊഴിലാളികളെ കണ്ടെത്താൻ കഴിയാതിരുന്നതോടെ പൂവൻതുരുത്ത് സ്വദേശിയായ അനൂപിനെ ആക്രമിക്കുകയായിരുന്നു.

പരിക്കേറ്റ അനൂപിനെ കോട്ടയം ജില്ല ജനറൽ ആശുപത്രിയിൽ പ്രവേശിപ്പിച്ചിരുന്നു. ​ എസ്.ഐ രഞ്ജിത് വിശ്വനാഥ​ൻ, എസ്.ഐ ഷിബുക്കുട്ടൻ, എ.എസ്.ഐ അൻസാരി, സീനിയർ സിവിൽ പൊലീസ് ഓഫിസർ സജി, സിവിൽ പൊലീസ് ഓഫിസർ ബോബി എന്നിവരാണ്​ അന്വേഷണ സംഘത്തിലുണ്ടായിരുന്നത്​​.