മെഡിക്കൽ കോളജിൽ കുട്ടിയുടെ മരണം; പൊലീസ്​ അന്വേഷണം തുടങ്ങി

ഗാന്ധിനഗർ: കോട്ടയം മെഡിക്കൽ കോളജിൽ ചികിത്സയിലിരുന്ന കുട്ടി മരിച്ചത് കുത്തിവെപ്പ്​ മൂലമാണെന്ന ബന്ധുക്കളുടെ പരാതിയിൽ പൊലീസ്​ അന്വേഷണം തുടങ്ങി. കുട്ടിയുടെ പിതാവ് ആലപ്പുഴ മാരാരിക്കുളം പൊലീസ് സ്​റ്റേഷനിലാണ്​ പരാതി നൽകി. സംഭവം നടന്നത് കോട്ടയം ഗാന്ധിനഗർ സ്​റ്റേഷൻ പരിധിയിൽ ആയതിനാൽ പരാതി ഗാന്ധിനഗർ സ്​റ്റേഷന് കൈമാറുകയായിരുന്നു. ബുധനാഴ്ച അർധരാത്രിക്ക്​ ശേഷമായിരുന്നു സംഭവം.

ചേർത്തല മാരാരിക്കുളം പുത്തൻകുളങ്ങര സുരേഷി​െൻറ മകൻ അർണവാണ്​ (മൂന്ന്​) മരിച്ചത്. കടുത്ത പനിയും ഛർദിയും ബാധിച്ച് മറ്റൊരു ആശുപത്രിയിൽ ചികിത്സയിൽ കഴിയുന്നതിനിടെ ആരോഗ്യനില മോശമായതിനെത്തുടർന്ന് ബുധനാഴ്ച രാവിലെ 11.30ന് കുട്ടികളുടെ ആശുപത്രിയിൽ എത്തിക്കുകയായിരുന്നു. പ്രാഥമികചികിത്സക്ക്​ കോവിഡ് നിരീക്ഷണ വിഭാഗത്തിൽ പ്രവേശിപ്പിച്ചതിനുശേഷം പ്രഥമചികിത്സ നൽകി.

സന്ധ്യയോടെ ആരോഗ്യനില മോശമാകുകയും തുടർന്ന് തീവ്രപരിചരണ വിഭാഗത്തിൽ പ്രവേശിപ്പിക്കുകയും ചെയ്തു. പിന്നീട് വീണ്ടും ആരോഗ്യനില മോശമായതിനെത്തുടർന്ന് വെൻറിലേറ്ററിൽ പ്രവേശിപ്പി​െച്ചങ്കിലും വ്യാഴാഴ്ച പുലർച്ച 1.30ന് കുട്ടി മരിച്ചു. ഇതിനിടയിൽ കുട്ടിയുടെ ചികിത്സരേഖ (കേസ് ഷീറ്റ്) കാണാതാകുകയും ചെയ്​തിരുന്നു. തീവ്രപരിചരണ വിഭാഗത്തിൽ നഴ്സ് കുത്തിവെപ്പ്​ നടത്തിയതുമൂലമാണ് മരണം സംഭവിച്ചതെന്നാരോപിച്ച് കുട്ടിയുടെ മാതാവ് നഴ്സിനെ മർദിക്കുകയും ബന്ധുക്കൾ ബഹളംവെക്കുകയും ചെയ്തിരുന്നു. ആശുപത്രി അധികൃതർ മാതാവിനെതിരെ പൊലീസിൽ പരാതി നൽകി.

അതിനിടെ, കടുത്ത ന്യുമോണിയയും അണുബാധയുമാണ് മരണകാരണമെന്ന് പോസ്​റ്റ്​മോർട്ടത്തിലെ പ്രാഥമിക വിവരമെന്ന് ഫോറൻസിക് ഡോക്ടർമാർ അറിയിച്ചു. ഇരുകൂട്ടരുടെയും പരാതി ലഭിച്ചിട്ടുണ്ടെന്നും അന്വേഷണം ആരംഭിച്ചിട്ടുണ്ടെന്നും ഗാന്ധിനഗർ എസ്.എച്ച്​.ഒ പറഞ്ഞു.