അഞ്ചുവർഷം, കോ​ട്ട​യം ജില്ലയിൽ തകർന്നത് 13 ധനകാര്യ സ്ഥാ​പ​ന​ങ്ങൾ

കോ​ട്ട​യം: അഞ്ചുവർഷത്തിനിടെ ജില്ലയിൽ തകർന്നത് ചെറുതും വലുതുമായ 13 സ്വകാര്യ ധനകാര്യ സ്ഥാ​പ​ന​ങ്ങൾ. മൂ​ന്നുവ​ർ​ഷം മു​മ്പ് കു​ന്ന​ത്തുക​ള​ത്തി​ൽ ചി​ട്ടി​ഫ​ണ്ട് ക​മ്പ​നി ത​കർന്നതാണ് അ​ടു​ത്തി​ടെ ജി​ല്ല​യി​ലു​ണ്ടാ​യ ഏ​റ്റ​വും വ​ലി​യ ത​ട്ടി​പ്പ്.

300 കോ​ടി​യാ​ണ് കു​ന്ന​ത്തുക​ള​ത്തി​ൽ ചി​ട്ടി, ജ്വ​ല്ല​റി ത​ട്ടി​പ്പു​മാ​യി ബ​ന്ധ​പ്പെ​ട്ട് ന​ട​ന്ന​തെന്നാണ് അന്വേഷണസംഘം കണ്ടെത്തിയത്. കു​ന്ന​ത്തു​ക​ള​ത്തി​ൽ ത​ട്ടി​പ്പി​ന് ഇ​ര​യാ​യ​ത് ആ​യി​ര​ത്തി​ല​ധി​കം നി​ക്ഷേ​പ​ക​രാ​ണ്. ഇ​വ​രി​ൽ പ​കു​തി​യി​ല​ധി​കം ആ​ളു​ക​ളും പ​രാ​തി​യു​മാ​യി അ​ന്വേ​ഷ​ണസം​ഘ​ത്തെ സ​മീ​പി​ച്ചി​ട്ടി​ല്ല.

കേ​സി​ൽ കോ​ട​തി ന​ട​പ​ടി​ ആ​രം​ഭി​ച്ചെ​ങ്കി​ലും ന​ഷ്​ട​പ​രി​ഹാ​ര തു​ക ഇടപാടുകാർക്ക് പൂർണമായും ല​ഭി​ച്ചി​ട്ടി​ല്ല. ഉ​ട​മയുടെ മ​ക്ക​ൾ, മ​രു​മ​ക്ക​ൾ എ​ന്നി​വ​ർ അറസ്​റ്റിലായെങ്കിലും പിന്നീട് ജാ​മ്യ​ത്തി​ലിറങ്ങി. കേസി​െൻറ തുടക്കത്തിൽ ഉടമ ജീവനൊടുക്കുകയും ചെയ്തു. റി​സീ​വ​റു​ടെ നേ​തൃ​ത്വ​ത്തി​ലാ​ണ്​ കു​ന്ന​ത്തുക​ള​ത്തി​ൽ ചിട്ടി ത​ട്ടി​പ്പി​ൽ അ​ന്വേ​ഷ​ണം.

2018 മേ​യിൽ കു​ന്ന​ത്തുക​ള​ത്തി​ൽ ജ്വ​ല്ല​റി ഗ്രൂ​പ്പും ചി​ട്ടി​ക്ക​മ്പ​നി​യും പാ​പ്പ​ർ ഹരജി നൽകിയശേ​ഷം സ്ഥാ​പ​ന​ങ്ങ​ൾ അ​ട​ച്ചുപൂ​ട്ടു​ക​യാ​യി​രു​ന്നു.

മുമ്പ്​ പു​തു​പ്പ​ള്ളി, ച​ങ്ങ​നാ​ശ്ശേ​രി എന്നിവിടങ്ങൾ കേ​ന്ദ്രീ​ക​രി​ച്ച് തുടങ്ങിയ ആ​പ്പി​ൾ ട്രീ ​ത​ട്ടി​പ്പി​ൽ 1000 കോ​ടി​ക്ക് മു​ക​ളി​ലാണ് നിക്ഷേപകർക്ക് നഷ്​ടമായത്. ആ​പ്പി​ൾ ട്രി ​എ​ന്ന പേ​രി​ൽ ഫി​നാ​ഷ്യ​ൽ ക​മ്പ​നി സ്ഥാ​പി​ച്ച​് നൂറുകണക്കിന് ശാഖകളും ആരംഭിച്ചിരുന്നു. കേസിനെ തുടർന്ന് സ്ഥാപനം അ​ട​ച്ചുപൂ​ട്ടി​ ഏ​ഴുവ​ർ​ഷം ക​ഴി​ഞ്ഞി​ട്ടും നി​ക്ഷേ​പ​ക​ർ​ക്കു പ​ണം തി​രി​കെ ല​ഭി​ച്ചി​ട്ടി​ല്ലെ​ന്ന് പ​റ​യു​ന്നു.

ഇപ്പോഴും മരുന്നുകച്ചവടവും നിക്ഷേപത്തിന് മൂന്നിരട്ടി വാഗ്ദാനം ചെയ്തും നിരവധി അനധികൃത സ്ഥാപനങ്ങൾ പ്രവർത്തിക്കുന്നുണ്ട് എന്നതാണ് ഞെട്ടിപ്പിക്കുന്ന വസ്തുത.