NEW നല്ല റോഡ്​ നിർമിക്കാൻ കഴിയാത്ത ഉദ്യോഗസ്ഥർ രാജിവെച്ച്​ ഒഴിയണം -ഹൈകോടതി

കൊച്ചി: മികച്ച രീതിയിൽ റോഡ്​ നിർമിക്കാൻ കഴിയാത്ത ഉദ്യോഗസ്ഥർ രാജിവെച്ച്​ ഒഴിയണമെന്ന്​ ഹൈകോടതി. മഴ മൂലമാണ്​ റോഡ്​ തകരുന്നതെന്ന ന്യായീകരണമൊന്നും അനുവദിക്കാനാവില്ല. അഞ്ചുവർഷം നിലനിൽക്കുന്ന രീതിയിലാണ്​ റോഡുകൾ വേണ്ടതെങ്കിലും ആറുമാസം നന്നായി കിടക്കുകയും ബാക്കി ആറുമാസം തകർന്നുകിടക്കുകയും ചെയ്യുന്ന വിധത്തിലാണ്​ റോഡുകൾ. ഒാരോ റോഡിനും എൻജിനീയർമാരു​െട മേൽനോട്ടം വേണമെന്ന് കോടതി ഉത്തരവിട്ടിട്ടും ഫലമില്ല. പകരം, കോടതി പരിധിവിട്ട് ഇടപെടു​െന്നന്ന കുറ്റപ്പെടുത്തലാണുള്ളത്​. മഴക്കാലത്തെ അതിജീവിക്കാൻ കഴിയുന്ന റോഡുകളുണ്ടാക്കാനാവില്ലെങ്കിൽ ബന്ധപ്പെട്ട എൻജിനീയർമാർ തൽസ്ഥാനത്ത്​ തുടരാൻ അർഹരല്ലെന്നും ജസ്​റ്റിസ്​ ദേവൻ രാമചന്ദ്രൻ വ്യക്തമാക്കി. കൊച്ചി നഗരത്തിലെയും പരിസരങ്ങളിലെയും റോഡുകൾ ടാർ ചെയ്​ത്​ ആറു മാസത്തിനകം തകർന്നതായി അമിക്കസ്​ക്യൂറി സമർപ്പിച്ച റിപ്പോർട്ട്​ പരിഗണിച്ചാണ്​ കോടതിയുടെ വാക്കാൽ പരാമർശം. കോർപറേഷ​ൻെറയും മറ്റ് തദ്ദേശ സ്ഥാപനങ്ങളുടെയും കീഴി​െല റോഡുകളുമാണ് തകർന്നതിലേറെയുമെന്നാണ്​ അമിക്കസ്ക്യൂറിയുടെ റിപ്പോർട്ട്​. റോഡിൽ കുഴിയുണ്ടായാൽ ഉടൻ നികത്താനുള്ള സൗകര്യമില്ലെന്നായിരുന്നു കോർപറേഷ​ൻെറ മറുപടി. അത്തരം സൗകര്യം ഒരുക്കുകയല്ലേ വേണ്ടതെന്ന്​ കോടതി ആരാഞ്ഞു. ഇപ്പോൾ ഒരുകുഴി നികത്തുന്നതിനു പകരം ഒരു റോഡ് മുഴുവൻ നികത്തേണ്ട അവസ്ഥയാണ്​. കഴിഞ്ഞ വർഷം തകർന്ന റോഡ് ഇത്തവണയും തകർന്നു. റോഡുകൾ സഞ്ചാരയോഗ്യമാക്കാൻ നിരന്തരം ഉത്തരവിട്ട് കോടതിക്ക് സ്വയം നാണക്കേടായിത്തുടങ്ങി. ഉത്തരവുകൾ മറക്കുന്ന രീതി അനുവദിക്കാനാകില്ല. റോഡ് സഞ്ചാരയോഗ്യമാക്കാൻ സ്വീകരിച്ച നടപടികൾ അറിയിക്കാൻ പൊതുമരാമത്ത്​, കൊച്ചി കോർപറേഷൻ, കൊച്ചി സ്മാർട്ട്​​ മിഷൻ, ജി.സി.ഡി.എ, അർബൻ അഫയേഴ്സ് ഡയറക്ടർ, പഞ്ചായത്ത് ഡയറക്​ടർ എന്നിവരോട് നിർദേശിച്ചു. അറ്റുകുറ്റപ്പണി നടത്തിയിട്ടും തകർന്ന്​ കിടക്കുന്ന സംസ്ഥാനത്തെ റോഡുകളുടെ വിശദാംശങ്ങൾ നൽകാനും ആവശ്യപ്പെട്ടു. കൊച്ചി നഗരത്തിൽ യാത്രക്കാർക്ക്​ തടസ്സമായി നിൽക്കുന്ന കേബിളുകളെല്ലാം നീക്കണം. വഴിവിളക്കുകൾ തെളിക്കാനും നടപടി വേണം. നടപ്പാതകൾ കൈയേറിയുള്ള പാർക്കിങ്​​ അനുവദിക്കാനാകില്ലെന്നും കോടതി വ്യക്തമാക്കി. നഗരത്തിൽ ആവശ്യമില്ലാത്ത കേബിളുകൾ നീക്കം ചെയ്യാൻ ബന്ധപ്പെട്ടവർക്ക്​ ഒരുമാസം സമയം അനുവദിച്ചതായി കോർപറേഷനും അറിയിച്ചു.