നെൽ കർഷകർക്ക്​ ആശങ്ക, ആഹ്ലാദം

കോട്ടയം: താങ്ങുവില വർധനയുടെ സന്തോഷത്തിനിടയിലും കർഷക മനസ്സുകളിൽ മ്ലാനത പടർത്തി നെല്ലുസംഭരണത്തിനുള്ള രജിസ്‌ട്രേഷന്‍ നടപടി വൈകുന്നു. രജിസ്‌ട്രേഷന്‍ ആരംഭിക്കാന്‍ വൈകുന്നത്​ സംഭരണം അവതാളത്തിലാകാൻ കാരണമാകുമെന്ന ആശങ്കയിലാണ്​​ കർഷകർ. പുഞ്ചകൃഷിയെ അപേക്ഷിച്ചു കുറവാണെങ്കിലും ജില്ലയുടെ പടിഞ്ഞാറന്‍ പഞ്ചായത്തുകളിലെ നിരവധി കര്‍ഷകര്‍ വിരിപ്പു കൃഷിയിറക്കിയിട്ടുണ്ട്.

ഇത്തവണ പ്രളയം വലിയ നാശം വിതച്ചിരുന്നു. ഇതിനിടെയാണ്​ രജിസ്‌ട്രേഷന്‍ ​ൈവകുന്നത്​. നെല്ല് കതിരായി തുടങ്ങിയിട്ടും രജിസ്‌ട്രേഷന്‍ ആരംഭിക്കാത്തത്​ കര്‍ഷകര്‍ക്കിടയില്‍ പ്രതിഷേധത്തിനും കാരണമായിട്ടുണ്ട്. കഴിഞ്ഞവര്‍ഷം ആഗസ്​റ്റ്​ 16ന്​ രജിസ്‌ട്രേഷന്‍ ആരംഭിച്ചിരുന്നു. ജില്ലയിലെ വിരിപ്പു കൃഷി തുടര്‍ച്ചയായ മൂന്നാം വര്‍ഷവും വെള്ളത്തിലായിരുന്നു. എന്നാല്‍, മുന്‍ വര്‍ഷങ്ങളേ അപേക്ഷിച്ച് ഇത്തവണ കനത്ത മഴയെത്തുടര്‍ന്നു കയറിയ വെള്ളം പെട്ടെന്ന് ഇറങ്ങിയതിനാല്‍ പ്രതീക്ഷിച്ചത്ര നഷ്​ടമുണ്ടായില്ലെന്നാണ്​ വിലയിരുത്തല്‍.മടവീണ പാടശേഖരങ്ങളില്‍നിന്ന്​ കര്‍ഷകര്‍ ഒന്നും പ്രതീക്ഷിക്കുന്നില്ല. എന്നാല്‍, വെള്ളംകയറിയ പാടശേഖരങ്ങളില്‍നിന്ന്​ പകുതിയില്‍ കൂടുതല്‍ വിളവ്​ കണക്കാക്കുന്നു. കഴിഞ്ഞവര്‍ഷം ശക്തമായ വെള്ളപ്പൊക്കമുണ്ടായിട്ടും 2300 ഹെക്ടറിലെ നെല്ലു സപ്ലൈകോ സംഭരിച്ചിരുന്നു.

ഇത്തവണ കൂടുതല്‍ സംഭരണം നടക്കുമെന്നാണ്​ സൂചന. അടുത്തമാസം പകുതിയോടെ കൊയ്ത്ത് ആരംഭിക്കാന്‍ കഴിയുമെന്നാണ്​ കര്‍ഷകരുടെ പ്രതീക്ഷ. പുഞ്ച കൃഷി അപ്പര്‍കുട്ടനാടന്‍ പാടശേഖരങ്ങളില്‍ 120ാം ദിവസം വിളവെടുക്കാമെങ്കില്‍ വിരിപ്പ്​ കൃഷിയില്‍ കൊയ്ത്തിന്​ 135-140 ദിവസം വേണ്ടിവരും. വൈകി രജിസ്‌ട്രേഷന്‍ ആരംഭിക്കുമ്പോള്‍ കര്‍ഷകര്‍ കൂട്ടത്തോടെ അക്ഷയ സെൻററുകളില്‍ എത്തുന്നത്​ കോവിഡ്​ ജാഗ്രതക്ക്​ ഏതിരായേക്കാമെന്നും പറയുന്നു.കൊയ്ത്ത് സജീവമാകുമ്പോള്‍ കൊയ്ത്ത് യന്ത്രങ്ങള്‍ക്ക്​ ക്ഷാമമുണ്ടാകാനുള്ള സാധ്യതയും നിലനില്‍ക്കുന്നു. അതേസമയം, കര്‍ഷകര്‍ ആശങ്കപ്പെടേണ്ട സാഹചര്യമില്ലെന്നും രജിസ്‌ട്രേഷന്‍ നടപടി ഉടൻ ആരംഭിക്കുമെന്ന്​ ജില്ല പാഡി മാര്‍ക്കറ്റിങ് ഓഫിസര്‍ അറിയിച്ചു.

എല്ലാവരുടെയും നെല്ല്​ സംഭരിക്കുന്ന രീതിയില്‍ കൊയ്ത്തിന്​ മുമ്പ്​ രജിസ്‌ട്രേഷന്‍ നടപടി പൂര്‍ത്തീകരിക്കാന്‍ കഴിയുമെന്നും അദ്ദേഹം പറഞ്ഞു. അതിനിടെ നെല്ലി​െൻറ താങ്ങുവില കിലേക്ക്​ 26.95 രൂപയിൽനിന്ന്​ 27.48രൂപയാക്കിയാണ്​ ഉയർത്തിയിരിക്കുന്നത്​. കേന്ദ്രസർക്കാർ വിഹിതമായ 18.68 രൂപയും സംസ്ഥാനത്തി​െൻറ പ്രോത്സാഹന ബോണസ്​ വിഹിതമായ 8.80 രൂപയും ചേർത്താണ്​ ​ സംഭരണവില നൽകിയത്​. അടുത്തിടെ കേന്ദ്രം താങ്ങുവില ഉയർത്തിയിരുന്നു. ഇതോടെയാണ്​ സർക്കാർ തുക വർധിപ്പിച്ചത്​​.