നിരീക്ഷണത്തിലിരുന്ന രോഗികള്‍ക്ക് സ്വകാര്യ ആംബുലന്‍സുകള്‍ യാത്ര നിഷേധിച്ചു

കൊക്കയാര്‍: പട്ടികവര്‍ഗ കോളനിയില്‍ കോവിഡ് നിരീക്ഷണത്തിലിരുന്ന രോഗികള്‍ക്ക് സ്വകാര്യ ആംബുലന്‍സുകള്‍ യാത്ര നിഷേധിച്ചു. ഒടുവില്‍ ആരോഗ്യവകുപ്പ്​ ജീവനക്കാര്‍ പി.പി.ഇ കിറ്റ് ധരിച്ച്​ സ്വകാര്യ ജീപ്പില്‍ ആശുപത്രിയിലെത്തിച്ചു. കുറ്റിപ്ലാങ്ങാട് പട്ടികവര്‍ഗ കോളനിയിലെ രോഗികളായ വയോധികരടക്കമുള്ളവരോടായിരുന്നു അവഗണന.

കുടുംബത്തിലെ രണ്ടുപേര്‍ക്ക് കോവിഡ് ബാധിച്ചതിനെത്തുടര്‍ന്ന്​ 85കാരനും ഹൃ​േദ്രാഗത്തിന് ചികിത്സയിലിരിക്കുന്ന 75കാരിയും ഇവരുടെ കൊച്ചുമകള്‍ 46കാരിയും നിരീക്ഷണത്തിലായിരുന്നു. ഇതിനിടെ വയോധികന്​ രോഗം മൂര്‍ച്ഛിക്കുകയും അവശനിലയിലാവുകയും ചെയ്തു. വിവരമറിഞ്ഞെത്തിയ പഞ്ചായത്ത്​ അംഗം ഐസിമോൾ വിപിന്‍ രണ്ട്​ ആംബുലന്‍സ് വിളിച്ചുവരുത്തിയെങ്കിലും രോഗികള്‍ നിരീക്ഷണത്തിലിരിക്കുന്നവരാ​െണന്ന്​ അറിഞ്ഞതോടെ മടങ്ങിപ്പോയി.

തുടര്‍ന്ന്​ ആരോഗ്യവകുപ്പ് അധികൃതരെ വിളിച്ചുവരുത്തി. ജെ.എച്ച്​.ഐ ഹരിലാല്‍, ജെ.പി.എച്ച്​.എന്‍ ഷിംന എന്നിവർ പി.പി.ഇ കിറ്റ് ധരിച്ച് സകാര്യവ്യക്തിയുടെ വാഹനത്തില്‍ കാഞ്ഞിരപ്പള്ളി താലൂക്ക്​ ആശുപത്രിയില്‍ എത്തിക്കുകയായിരുന്നു. ആശുപത്രിയിൽ രോഗികളെ പരിശോധിക്കാന്‍ കാലതാമസമുണ്ടായതായും ആരോപണമുണ്ട്.

പിന്നീട് നടത്തിയ പരിശോധനയില്‍ മൂന്നുപേര്‍ക്കും കോവിഡ് പോസിറ്റിവാണെന്ന്​ കണ്ടെത്തി. തുടര്‍ന്ന്​ ഇവരെ തൊടുപുഴയിലെ സര്‍ക്കാര്‍ ആശുപത്രിയിലേക്ക്​ മാറ്റി. കൊക്കയാര്‍ പ്രാഥമികാരോഗ്യ കേന്ദ്രത്തില്‍ ആംബുലന്‍സ് ഇ​െല്ലന്ന്​ 'മാധ്യമം' മുമ്പ് റിപ്പോര്‍ട്ട് ചെയ്തിരുന്നു.

പഞ്ചായത്തോ സര്‍ക്കാറോ ഒരു നടപടിയും സ്വീകരിച്ചില്ല. പട്ടികവര്‍ഗ വിഭാഗത്തില്‍പെട്ട രോഗികളോട്​ കാട്ടിയ അവഗണനക്കെതിരെ വ്യാപകപ്രതിഷേധം ഉയരുന്നുണ്ട്.