കോട്ടയത്ത് ആരാകും ജില്ല പഞ്ചായത്ത്​ അധ്യക്ഷ​? ചൂടേറിയ ചർച്ച

കോട്ടയം: ഇരുമുന്നണികൾക്കും അഭിമാന പോരാട്ടമാണ്​ ജില്ല പഞ്ചായത്തിൽ. ആര്​ ജയിച്ചാലും സംവരണമായതിനാൽ അധ്യക്ഷ സ്ഥാന​ത്തെത്തുന്നത്​ വനിതയായിരിക്കും. ഏതു മുന്നണിയാലായാലും ഭരണം പങ്കി​ട്ടെടുക്കേണ്ടിവരുമെന്നതും ഉറപ്പ്​. വിജയം അവകാശപ്പെടുന്ന ഇരുമുന്നണികളിലും അധ്യക്ഷരാവാനുള്ളവരുടെ പേരുകൾ സംബന്ധിച്ച്​ ചർച്ച സജീവമാണ്​.

22 ഡിവിഷനുകളുള്ള ജില്ല പഞ്ചായത്തിൽ എൽ.ഡി.എഫിന്​​ ​11 വനിതകളും യു.ഡി.എഫിന്​​ 10 വനിതകളുമാണ് സ്ഥാനാർഥികളായുള്ളത്​. ഇവരിൽ മുൻ പ്രസിഡൻറുമാരും ഉണ്ട്​.

സി.പി.എം​ അധ്യക്ഷ സ്ഥാനത്തേക്ക്​ പരിഗണിക്കുന്നത്​ കുമരകം ഡിവിഷനിൽനിന്നുള്ള കെ.വി. ബിന്ദുവിനെയും പാമ്പാടിയിൽനിന്നുള്ള ഫ്ലോറി മാത്യുവിനെയുമാണ്​. ഇതിൽതന്നെ കെ.വി. ബിന്ദുവിനാണ്​ കൂടുതൽ സാധ്യത. പള്ളം ബ്ലോക്ക് പഞ്ചായത്ത് അംഗം, കുമരകം പഞ്ചായത്ത് അംഗം, ഏറ്റുമാനൂർ ബ്ലോക്ക് പഞ്ചായത്ത് സ്​റ്റാൻഡിങ്​ കമ്മിറ്റി അധ്യക്ഷ എന്നീ നിലകളിൽ പ്രവർത്തിച്ചിരുന്നു. ജനാധിപത്യ മഹിള അസോ. ജില്ല പ്രസിഡൻറും സംസ്ഥാന കമ്മിറ്റി അംഗവുമാണ്.

എൽ.ഡി.എഫി​െൻറ ഭാഗമായ കേരള കോൺഗ്രസ്​ ​േജാസ്​ വിഭാഗത്തി​െൻറ പരിഗണനയിലുള്ളത്​ മുൻ പ്രസിഡൻറ്​ നിർമല ജിമ്മിയാണ്​. കുറവിലങ്ങാട്​ ഡിവിഷനിൽനിന്നുള്ള നിർമല ജിമ്മി 2013 മുതൽ 2015 വരെ കാലയളവിൽ ജില്ല പഞ്ചായത്ത്​ പ്രസിഡൻറായിരുന്നു. അന്ന്​ യു.ഡി.എഫി​െൻറ ഭാഗമായിരുന്നെങ്കിലും ഇപ്പോൾ ജോസ്​ വിഭാഗത്തിനൊപ്പം എൽ.ഡി.എഫിലാണ്. കേരള വനിത കോൺഗ്രസ് എം സംസ്ഥാന പ്രസിഡൻറുകൂടിയാണ്​. 2000ൽ ളാലം ബ്ലോക്ക് പഞ്ചായത്ത് പ്രസിഡൻറും 2005ലും 2010ലും ജില്ല പഞ്ചായത്ത്​ അംഗവുമായിരുന്നു.

കോൺഗ്രസിൽ സുധ കുര്യൻ, രാധ വി.നായർ, ബീന ബിനു എന്നിവരുടെ പേരുകളാണ്​ കേൾക്കുന്നത്​. വാകത്താനം ഡിവിഷനിൽനിന്ന്​ മൂന്നുതവണ മത്സരിച്ചു ജയിച്ച ആളാണ് സുധ കുര്യൻ​. ജില്ല പഞ്ചായത്ത്​ വൈസ്​​പ്രസിഡൻറായിരുന്നു. രണ്ടുതവണ ആക്​ടിങ്​ പ്രസിഡൻറ്​ സ്ഥാനവും വഹിച്ചിട്ടുണ്ട്​. പാമ്പാടിയിൽനിന്നുള്ള രാധ വി.നായർ 2010മുതൽ 2013 വരെ പ്രസിഡൻറായിരുന്നു. 2010ൽ കുമരകത്ത് അട്ടിമറി വിജയം നേടിയ ആളാണ്​ ബീന ബിനു. പരിപ്പ് ഡിവിഷനിൽനിന്ന് ജയിച്ച ബീന രണ്ടുതവണ ഏറ്റുമാനൂർ ബ്ലോക്ക് പഞ്ചായത്ത് പ്രസിഡൻറുമായിട്ടുണ്ട്. നിലവിൽ മഹിള കോൺഗ്രസ് സംസ്ഥാന സെക്രട്ടറിയാണ്.

ജോസഫ്​ വിഭാഗത്തെ പ്രധാന വനിത മേരി സെബാസ്​റ്റ്യനാണ്​. ഇവരെ തന്നെയാണ്​ ജോസഫ്​ വിഭാഗം അധ്യക്ഷസ്ഥാനത്തേക്ക്​ പരിഗണിക്കുന്നതും. കുറവിലങ്ങാട്​ ഡിവിഷനിലെ എൽ.ഡി.എഫ്​ സ്ഥാനാർഥി നിർമല ജിമ്മിയുടെ എതിരാളിയാണ്​ മേരി സെബാസ്​റ്റ്യൻ.

ജോസ്​-ജോസഫ്​ വിഭാഗങ്ങൾ നേർക്കുനേർ മത്സരിക്കുന്ന ഡിവിഷനാണെന്ന പ്ര​ത്യേകതയും കുറവിലങ്ങാടിനുണ്ട്​. ജില്ല പഞ്ചായത്ത്​ വൈസ് പ്രസിഡൻറ്​​, ജില്ല പഞ്ചായത്ത്​ അംഗം, കടുത്തുരുത്തി പഞ്ചായത്ത്​ പ്രസിഡൻറ്​ എന്നീ പദവികൾ വഹിച്ചിട്ടുണ്ട്​. കാഞ്ഞിരപ്പള്ളി ഡിവിഷനിൽനിന്നുള്ള മറിയാമ്മ ജോസഫും പരിഗണനയിലുണ്ട്​.