മുറ്റത്തുനിന്ന​ വീട്ടമ്മയുടെ മാല കവർന്ന പ്രതി പിടിയിൽ

കടുത്തുരുത്തി: മുറ്റത്തുനിന്ന വീട്ടമ്മയുടെ രണ്ടരപ്പവ​െൻറ മാല കവർന്ന ശേഷം രക്ഷപ്പെട്ട പ്രതിയെ പത്താംദിവസം പൊലീസ് പിടികൂടി. മണർകാട് തിരുവഞ്ചൂർ പ്ലാക്കൂഴി വീട്ടിൽ ജയകൃഷ്ണനെയാണ് (23) കടുത്തുരുത്തി പൊലീസ് സംഘം പിടികൂടിയത്. ബൈക്കിലെത്തി മാല മോഷ്​ടിക്കുന്ന നിരവധി കേസുകളിൽ പ്രതിയായിട്ടുണ്ട് ജയകൃഷ്ണനെന്ന്​ പൊലീസ്​ പറഞ്ഞു.

മാഞ്ഞൂർ അയ്യൻകോവിൽ അമ്പലത്തിനു സമീപം ശിവമന്ദിരം വീട്ടിൽ രഘുനാഥ​െൻറ ഭാര്യ സതീദേവിയുടെ (51) സ്വർണമാലയാണ് പ്രതി കവർന്നത്. കഴിഞ്ഞ 22ന് വൈകീട്ട് ഏഴോടെയായിരുന്നു സംഭവം. ക്ഷേത്ര ദർശനത്തിനുശേഷം വീട്ടിലേക്ക്​ കയറുകയായിരുന്നു സതീദേവി.

ഈ സമയം ബൈക്കിൽ പിന്നാലെ എത്തിയ പ്രതി, ഇവരുടെ കഴുത്തിൽക്കിടന്ന മാല മോഷ്​ടിക്കുകയായിരുന്നു.

സി.ഐ പി.എസ്. ബിനു, എസ്.ഐ ടി.എസ്. റെനീഷ് എന്നിവരുടെ നേതൃത്വത്തിൽ സൈബർ സെല്ലി​െൻറയും വിവിധ സ്ഥലങ്ങളിൽനിന്നുള്ള സി.സി ടി.വി കാമറ ദൃശ്യങ്ങളുടെയും അടിസ്ഥാനത്തിലുള്ള പരിശോധനയെതുടർന്നാണ് മുമ്പ്​ നിരവധി മാല മോഷണക്കേസുകളിൽ പ്രതിയായ ജയകൃഷ്ണനിലേക്ക്​ അന്വേഷണം എത്തിയത്.

ഇയാളുടെ മൊബൈൽ ഫോൺ ടവർ ലൊക്കേഷൻ അടക്കം ശേഖരിച്ചുനടത്തിയ അന്വേഷണത്തിനൊടുവിൽ സംഭവദിവസം കടുത്തുരുത്തിയിലും പരിസരത്തുമുണ്ടായിരുന്നതായി കണ്ടെത്തി.

ഗ്രേഡ് എസ്.ഐ സജി, എ.എസ്.ഐമാരായ രാംദാസ്, പ്രമോദ് എന്നിവരുടെ നേതൃത്വത്തിലുള്ള സംഘമാണ് പ്രതിയെ അറസ്​റ്റ്​ ചെയ്തത്.

മണർകാട് പൊലീസ് സ്​റ്റേഷനിൽ മൂന്നു മാല മോഷണക്കേസുകളും ഈസ്​റ്റ്​ പൊലീസ് സ്​റ്റേഷനിൽ രണ്ടു മാല മോഷണക്കേസുകളും ഗാന്ധിനഗർ, അയർക്കുന്നം സ്‌റ്റേഷനുകളിൽ ഓരോ മാല മോഷണക്കേസും ഇയാളുടെ പേരിലുണ്ട്. പ്രതിയെ കോടതിയിൽ

ഹാജരാക്കി.