ബസ് യാത്ര ദുരിതമായി വിദ്യാർഥികൾ

കക്കോടി: സ്വകാര്യബസുകൾ കയറ്റാൻ മടിക്കുന്നതുമൂലം വിദ്യാർഥികൾക്ക് ദുരിതയാത്ര തുടങ്ങി. ബസുകൾ സ്റ്റോപ്പിൽ നിർത്താതെയും വിദ്യാർഥികളെ കയറാൻ അനുവദിക്കാതെയുമാണ് ക്രൂരതകാട്ടുന്നത്. വിദ്യാർഥികൾക്ക് കൃത്യസമയത്ത് സ്കൂളിലെത്താനോ വൈകീട്ട് വീട്ടിലെത്താനോ കഴിയുന്നില്ല. കക്കോടി, എരക്കുളം, മൂട്ടോളി, കക്കോടി മുക്ക്, കുമാരസ്വാമി ഭാഗത്തെ കുട്ടികൾക്ക് ബസ് സ്റ്റോപ്പുകളിൽ ഏറെനേരം കാത്തിരിക്കേണ്ടിവരുന്നു. ബസുകൾ നടുറോഡിൽ നിർത്തി യാത്രക്കാരെ ഇറക്കി കുതിച്ചുപായുകയാണ്. സ്വകാര്യ ബസുകളുടെ എണ്ണം പൊതുവെ കുറഞ്ഞസമയത്ത് ഉള്ള ബസുകൾ വിദ്യാർഥികളെ കയറ്റാത്തത് ഏറെ പ്രയാസത്തിനിടയാക്കുന്നു.