വൃദ്ധദമ്പതികളെ കെട്ടിയിട്ട് പണംതട്ടി; ആക്രമികൾക്കായി തിരച്ചിൽ

വീരാജ്പേട്ട: വൃദ്ധദമ്പതികളെ കെട്ടിയിട്ട് പണംതട്ടിയ ആക്രമികൾക്കായി തിരച്ചിൽ ശക്തമാക്കി. പോളിബെട്ടക്കടുത്ത ബാടഗ- ബാണംഗാലയിലാണ് സംഭവം. മലയാളികളായ തങ്കപ്പൻ (70), ജാനകി (64) ദമ്പതികളെയാണ് ആക്രമിച്ച് പണംതട്ടിയത്. ഇരുവരും മാത്രമാണ് വീട്ടിൽ താമസം. വെള്ളിയാഴ്ച രാത്രി ഭക്ഷണം കഴിക്കുന്നതിനിടെ മുഖംമൂടി ധരിച്ച മൂന്നുപേർ വീട്ടിന്റെ പിൻവാതിലിലൂടെ കടന്ന് വായിൽ തുണി തിരുകിക്കുത്തി മുറിയിൽ പൂട്ടിയിടുകയായിരുന്നു. ദമ്പതികളെ ഭീഷണിപ്പെടുത്തി അലമാരകളുടെ താക്കോൽ വാങ്ങിച്ച് അലമാരയിൽ ഉണ്ടായിരുന്ന രണ്ട് ലക്ഷം രൂപ മോഷ്ടിക്കുകയും ജാനകിയുടെ കഴുത്തിൽ ഉണ്ടായിരുന്ന സ്വർണമാല തട്ടിപ്പറിക്കുകയുമായിരുന്നു. തൊട്ടടുത്ത വീട്ടുകാർ വന്നപ്പോഴേക്കും ആക്രമികൾ ഓടിരക്ഷപ്പെട്ടു. ദമ്പതികൾക്ക് രണ്ട് പെൺമക്കൾ ഉണ്ട്. ഇവർ നാട്ടിൽ ഇല്ല. ആക്രമികൾക്ക് വേണ്ടി തിരച്ചിൽ തുടരുകയാണ്. സിദ്ധാപുരം പൊലീസ് കേസെടുത്തു.