േദശീയപാത വികസനം: വ്യാപാരികളുടെ ലൈസൻസ് റദ്ദാക്കിയ നടപടി; നഗരസഭ മാർച്ചിൽ പ്രതിഷേധമിരമ്പി

പയ്യോളി: ദേശീയപാത വികസനത്തി‍ൻെറ ഭാഗമായി പയ്യോളിയിലെ വ്യാപാരികളുടെ ലൈസൻസ് മുന്നറിയിപ്പില്ലാതെ കൂട്ടത്തോടെ റദ്ദാക്കിയ നടപടിക്കെതിരെ നടത്തിയ നഗരസഭ മാർച്ചിൽ പ്രതിഷേധമിരമ്പി. തിങ്കളാഴ്ച ഉച്ചവരെ ടൗണിലെ കടകൾ അടച്ചിട്ടാണ് വ്യാപാരികളും കടകളിൽ ജോലിചെയ്യുന്നവരുമടക്കം മാർച്ചിൽ അണിനിരന്നത്. ബസ്​സ്​റ്റാൻഡ് പരിസരത്തുനിന്ന് ആരംഭിച്ച മാർച്ച് നഗരസഭ കവാടത്തിന് സമീപം പൊലീസ് തടഞ്ഞു. കേരള വ്യാപാരി വ്യവസായി ഏകോപന സമിതി പയ്യോളി യൂനിറ്റി‍ൻെറ ആഭിമുഖ്യത്തിൽ സംഘടിപ്പിച്ച മാർച്ച് യൂത്ത് വിങ്​ സംസ്ഥാന ജനറൽ സെക്രട്ടറി മനാഫ് കാപ്പാട് ഉദ്ഘാടനം ചെയ്തു. യൂനിറ്റ് പ്രസിഡൻറ്​​ കെ.പി. റാണാപ്രതാപ് അധ്യക്ഷത വഹിച്ചു. ജില്ല സെക്രട്ടറിയും വടകര മർച്ചൻറ്​​ അസോസിയേഷൻ പ്രസിഡൻറുമായ എം. അബ്​ദുസ്സലാം, മണ്ഡലം കമ്മിറ്റി പ്രസിഡൻറ്​​ ഇ.കെ. സുകുമാരൻ, വൈസ് പ്രസിഡൻറ് മോഹനൻ പൂക്കാട് തുടങ്ങിയവർ സംസാരിച്ചു. തുടർന്ന് നഗരസഭ അധികാരികൾക്ക് വ്യാപാരികൾ നിവേദനം സമർപ്പിച്ചു. ദേശീയപാതയോരത്തെ 56 വ്യാപാരികള്‍ക്കാണ് നോട്ടീസ് നൽകിയത്​. എന്നാൽ, നിലവിലെ സാഹചര്യം ജില്ല കലക്ടറെ അറിയിച്ചിട്ടുണ്ടെന്നും നിവേദനം ഏറ്റുവാങ്ങിയശേഷം നഗരസഭ സെക്രട്ടറി ഷെറിൻ ഐറിൻ സോളമൻ വ്യാപാരിനേതാക്കളോട് പറഞ്ഞു. മണ്ഡലം വൈസ് പ്രസിഡൻറ്​​ എം. ഫൈസൽ, യൂനിറ്റ് സെക്രട്ടറി പി.എം. റിഗേഷ്, ട്രഷറര്‍ ടി. വീരേന്ദ്രൻ, യൂത്ത് വിങ് മണ്ഡലം പ്രസിഡൻറ്​​ റഹീസ് മലയിൽ, ജനറല്‍ സെക്രട്ടറി ജയേഷ് ഗായത്രി, ടി.എ. ജുനൈദ് എന്നിവർ മാർച്ചിന് നേതൃത്വം നൽകി. പടം പയ്യോളിയിൽ വ്യാപാരികളുടെ ലൈസൻസ് റദ്ദ് ചെയ്ത നടപടിക്കെതിരെ നടത്തിയ നഗരസഭ ഓഫിസ് മാർച്ച് യൂത്ത് വിങ്​ സംസ്ഥാന ജനറൽ സെക്രട്ടറി മനാഫ് കാപ്പാട് ഉദ്ഘാടനം ചെയ്യുന്നു