വാടക ഇളവ് അനുവദിക്കണം -വ്യാപാരികള്‍

കോഴിക്കോട്: സര്‍ക്കാര്‍ കെട്ടിടത്തില്‍ വ്യാപാരം നടത്തുന്ന വ്യാപാരികള്‍ക്ക് കോവിഡ്​ സാഹചര്യത്തില്‍ അനുവദിച്ച വാടക ഇളവ് നടപ്പാക്കണമെന്ന് വ്യാപാരി വ്യവസായി സമിതി. ജൂലൈ മുതല്‍ ഡിസംബര്‍ വരെ ആറുമാസത്തെ വാടക ഒഴിവാക്കാനാണ് സര്‍ക്കാര്‍ ഉത്തരവ് ഇറക്കിയത്. എന്നാല്‍, സര്‍ക്കാര്‍ അനുവദിച്ച ഈ ഇളവ് നല്‍കാന്‍ ജില്ലയിലെ ചില തദ്ദേശ സ്വയംഭരണ സ്ഥാപനങ്ങള്‍ തയാറായിട്ടില്ല. സര്‍ക്കാര്‍ പ്രഖ്യാപിച്ച ആനുകൂല്യങ്ങള്‍പോലും നിഷേധിക്കുന്ന നടപടി പ്രതിഷേധാര്‍ഹമാണെന്ന് വ്യാപാരി വ്യവസായി സമിതി ജില്ല ഭാരവാഹികളുടെ യോഗം അഭിപ്രായപ്പെട്ടു. ഒമിക്രോണിന്റെ സാഹചര്യത്തില്‍ വ്യാപാരസ്ഥാപനങ്ങള്‍ അടച്ചിടുന്ന തീരുമാനങ്ങള്‍ സര്‍ക്കാറിന്റെ ഭാഗത്തുനിന്ന് ഉണ്ടാവരുതെന്നും യോഗം അഭിപ്രായപ്പെട്ടു. ജില്ലാ പ്രസിഡന്‍റ്​ സൂര്യ അബ്ദുൽ ഗഫൂര്‍ അധ്യക്ഷത വഹിച്ചു. സി.കെ. വിജയന്‍, ടി. മരക്കാര്‍, കെ.എം. റഫീഖ്, സി.വി. ഇഖ്ബാല്‍, ഗഫൂര്‍ രാജധാനി, കെ.സോമന്‍ എന്നിവര്‍ സംസാരിച്ചു.