മലപ്പുറത്തിന്‍റെ ഗ്രാമക്കാഴ്​ചകളുമായി ഫോ​ട്ടോപ്രദർശനം

കോഴിക്കോട്​: മലപ്പുറത്തിന്‍റെ മനോഹരമായ ഗ്രാമക്കാഴ്ചകളുമായി ബഷീർ കാടേരിയുടെ ഫോ​ട്ടോപ്രദർശനം തുടങ്ങി. ഗൃഹാതുരകാഴ്​ചകളുടെയും വിസ്മൃതിയിലേക്ക്​ മറയുന്ന നാട്ടുദൃശ്യങ്ങളുടെയും ആവിഷ്കാരമാണ്​ ലളിതകല അക്കാദമി ആർട്ട്​ ഗാലറിയിൽ ഒരുക്കിയ ഫോട്ടോ പ്രദർശനം. പുരോഗതിയുടെ കാലം വരും മുമ്പത്തെ ഗ്രാമീണജീവിതം, കൃഷി, നെൽപാടങ്ങളുടെ ഹരിതഭംഗി കാലത്തിന്‍റെ ഒഴുക്കിൽ ഇല്ലാതായിപ്പോയ ഗ്രാമമുദ്രകൾ ഇവയെല്ലാം മിഴിവോടെ പകർത്തിയിരിക്കുന്നു ഫോ​ട്ടോഗ്രാഫർ. മലപ്പുറം ജില്ലയിലെ തിരൂരങ്ങാടി സ്വദേശിയായ ബഷീർ ലളിതകലാ അക്കാദമിയുടെതടക്കം നിരവധി പുരസ്കാരം നേടിയിട്ടുണ്ട്​. ഇന്ത്യയിലും വിദേശത്തും പ്രദർശനങ്ങൾ നടത്തിയിട്ടുണ്ട്​. ഫെബ്രുവരി 28 വരെയാണ്​ പ്രദർശനം. ഫോട്ടോഗ്രാഫർമാരായ നന്ദകുമാർ മൂടാടി, പി. ​ മുസ്തഫ, അജീബ്​ കൊമാച്ചി, യൂസുഫ്​ കാസിനോ എന്നിവർ ചേർന്ന്​ പ്രദർശനം ഉദ്​ഘാടനം ചെയ്തു.