കേന്ദ്ര വാഴ്​സിറ്റിയിൽ 'ചുമതല' നൽകിയ ആർ.എസ്​.എസുകാരന്‍റെ യോഗ്യത അന്വേഷിക്കാൻ തീരുമാനം

കാസർകോട്​: കേന്ദ്ര സർവകലാശാലയിലെ ആർ.എസ്​.എസ്​ താൽപര്യങ്ങൾ സംരക്ഷിക്കാൻ ചുമതല നൽകിയ ഭാരതീയ വിചാരകേന്ദ്രം മുൻ വൈസ്​ പ്രസിഡന്‍റിന്​ അസോസിയറ്റ്​ പ്രഫസർ പദവി നൽകിയത്​ പരിശോധിക്കാൻ സർവകലാശാല എക്സിക്യൂട്ടിവ്​ കൗൺസിൽ തീരുമാനിച്ചു. അസോ. പ്രഫസർ നിയമന അഭിമുഖത്തിൽ പ​ങ്കെടുത്ത അധ്യാപിക പ്രധാനമന്ത്രിക്ക്​ നൽകിയ പരാതി ഫെ​ബ്രുവരി നാലിനു ചേർന്ന കൗൺസിൽ യോഗത്തിൽ അജണ്ടയായി വന്നിരുന്നു. ഇതാണ്​ അന്വേഷണ തീരുമാനമെടുക്കാൻ കാരണം. 2015ലാണ്​ വിചാരകേന്ദ്രം നേതാവിന്​ അസോ.​ പ്രഫസർ സ്ഥാനത്തേക്ക്​ നിയമനം നൽകിയത്​. ഈ അഭിമുഖത്തിൽ പ​ങ്കെടുത്ത അധ്യാപികക്ക്​ അഭിമുഖത്തിൽ ഉണ്ടായിരിക്കേണ്ട അക്കാദമിക്​ പെർഫോമൻസ്​ ഇൻഡിക്കേ​റ്റേർസ്​ (എ.പി.ഐ) മിനിമം സ്​കോറായ 300നും മുകളിലായിരുന്നു. അസോ.​ പ്രഫസറാകണമെങ്കിൽ ഒരു പിഎച്ച്.​ഡി വിദ്യാർഥിക്കെങ്കിലും ഗൈഡ്​ ആയിരിക്കണമെന്നും ഇന്‍റർനാഷനൽ പബ്ലിക്കേഷനിൽ ആർട്ടിക്ക്ൾ പ്രസിദ്ധപ്പെടുത്തണമെന്നും നിബന്ധനയുണ്ട്​. ഇതൊന്നുമില്ലാത്ത മുൻ വിചാരകേന്ദ്രം നേതാവിന്​ എ.പി.ഐ സ്​കോർ 115ൽ താഴെയായിരുന്നു ഇന്‍റർവ്യൂവിൽ ലഭിച്ചത്​. സർവകലാശാലയിൽ കേന്ദ്ര സർക്കാറിന്‍റെ രാഷ്ട്രീയ പ്രതിനിധിയായി കണ്ടെത്തിയ വിചാരകേന്ദ്രം നേതാവിനെ ഏതുവിധേനയും നിയമിക്കുന്നതിന്​ മുൻ വി.സിയുടെ ഇടപെടലുമുണ്ടായി. അതിനാൽ ഇയാളുടെ സ്​കോർ അധ്യാപികയുടെ സ്​കോറായ 310നും മുകളിൽ 315 ആയി ഉയർത്തിക്കെട്ടുകയായിരുന്നു. അഭിമുഖത്തിനുശേഷം, അഭിമുഖം നടത്തിയവരുടെ താമസസ്ഥലത്ത്​ എത്തിയാണ്​ സ്​കോർ വർധിപ്പിച്ചത്​ എന്നും ഒപ്പിട്ട തീയതി അഭിമുഖ ദിവസത്തേതല്ല എന്നും ആക്ഷേപമുണ്ടായി. അഭിമുഖത്തിന്‍റെ സ്​കോർ വിവരങ്ങൾ അധ്യാപിക വിവരാവകാശപ്രകാരം ചോദിച്ചപ്പോൾ നൽകിയില്ല. തുടർന്നാണ്​ അന്നത്തെ വി.സി ഡോ. ജി. ഗോപകുമാറിനും പ്രധാനമന്ത്രിയുടെ ഓഫിസിനും പരാതി നൽകിയത്​. മിനിമം സ്​കോർ, ഇയാളുടെ നിയമനത്തിനെതിരെയുള്ള ഓഡിറ്റ്​ റിപ്പോർട്ട്​, മുൻകാല പ്രാബല്യത്തോടെ പ്രഫസർ പദവി നൽകിയത്​ തുടങ്ങിയ വിഷയങ്ങൾ അന്വേഷണ പരിധിയിൽ കൊണ്ടുവരാൻ സർവകലാശാല ഗ്രീവൻസ്​ റിഡ്രസ്സൽ കമ്മിറ്റിക്ക്​ നിർദേശം നൽകിയിട്ടുണ്ട്​. എക്സിക്യൂട്ടിവ്​ കൗൺസിൽ മിനുട്​സിൽ വിചാരകേന്ദ്രം നേതാവിന്‍റെയോ അധ്യാപികയുടെയോ പേരുപറഞ്ഞിട്ടില്ല. സർവകലാശാലയിൽ ബി.ജെ.പിയുടെ ഒരു വിഭാഗത്തിന്‍റെ മാത്രം താൽപര്യം സംരക്ഷിക്കുന്നുവെന്ന പേരിൽ ഇയാളെ ബി.ജെ.പിയും ഒറ്റപ്പെടുത്തിയിരിക്കുകയാണ്​. ഇപ്പോൾ വിചാര കേന്ദ്രത്തിൽനിന്നും പുറത്താണ്​. രവീന്ദ്രൻ രാവണേശ്വരം