കടമുറിയിൽ കുടുങ്ങിയ കുട്ടിയെ രക്ഷിച്ചു

കോഴിക്കോട്‌: കടമുറിയിൽ കുടുങ്ങിയ രണ്ടു വയസ്സുകാരനെ അഗ്‌നി രക്ഷാസേനയുടെ നേതൃത്വത്തിൽ രക്ഷപ്പെടുത്തി. കളിക്കുന്നതിനിടെ സി.എച്ച്‌ മേൽപ്പാലത്തിനടിയിലെ ജാഗ്‌രംഗ്‌ ഇലക്‌ട്രോണിക്‌സ്‌ കടയിലെ മുറിയിലാണ്‌ നൗഷാദിന്റെ മകൻ രണ്ടു വയസ്സുകാരൻ കുടുങ്ങിയത്‌. ബുധനാഴ്​ച രാത്രി എട്ടരയോടെയായിരുന്നു സംഭവം. കടയുടെ സമീപത്ത്‌ കളിക്കുന്നതിനിടെ മുറിയിലേക്ക്‌ ഓടിക്കയറിയ​പ്പോൾ വാതിൽ അടയുകയായിരുന്നു. ഏറെ നേരം പരിശ്രമിച്ചിട്ടും കടയിലുള്ളവർക്ക്‌ കുട്ടിയെ രക്ഷിക്കാൻ കഴിഞ്ഞില്ല. തുടർന്ന്‌ ബീച്ച്​ അഗ്‌നിരക്ഷാസേനയിൽ അറിയിച്ചു. അസി.സ്‌റ്റേഷൻ ഓഫിസർ സദാനന്ദൻ കൊളക്കാടിന്റെ നേതൃത്വത്തിലുള്ള സംഘത്തിലെ ഡ്രൈവർ കെ.രാജേഷാണ്​ പൂട്ട്‌ പൊളിച്ച്​ രക്ഷിച്ചത്​.