വിദ്യാലയങ്ങളിൽ കൗൺസിലർമാരെ നിയമിക്കണമെന്ന് ആവശ്യം

കോഴിക്കോട്​: വിദ്യാർഥികൾക്ക്​ സംഘർഷങ്ങളെയും സമ്മർദ്ദങ്ങളെയും അതിജീവിക്കാൻ വിദ്യാലയങ്ങളിൽ കൗൺസലിംഗ്​ സേവനം ലഭ്യമാക്കണമെന്നും ഇതിനായി ബന്ധപ്പെട്ട വിഷയങ്ങളിൽ യോഗ്യതയുള്ളവർക്കായി വിദ്യാഭ്യാസവകുപ്പിൽ സ്​ഥിരം തസ്​തിക സൃഷ്​ടിച്ച്​ നിയമനം നൽകണമെന്നും 'അസോസിയേഷൻ ഓഫ്​ സൈക്കോളജിക്കൽ കൗൺസിലേർസ്'​ ആവശ്യപ്പെട്ടു.

മനശാസ്​ത്ര പരിചരണ മേഖലയിൽ പ്രവർത്തിക്കുന്ന കൗൺസിലർമാരുടെ സംഘടനയുടെ രൂപവത്​കരണ സമ്മേളനം കോഴിക്കോട് നഗരസഭ വിദ്യാഭ്യാസ സ്​റ്റാൻറിംഗ്​ കമ്മിറ്റി ചെയർമാൻ എം.പി. അനിൽ കുമാർ ഉദ്​ഘാടനം ചെയ്​തു. അസോസിയേഷൻ ​പ്രസി​ഡൻറ്​ ഇ.കെ. സുരേഷ്​ കുമാർ അധ്യക്ഷതവഹിച്ചു.

വിദ്യാർഥികൾക്ക് പുറമെ രക്ഷിതാക്കൾക്കും പ്രാഥമിക ആരോഗ്യ കേന്ദ്രങ്ങൾ മുഖേന പൊതുജനങ്ങൾളും കൗൺസിലിംഗ് സേവനം ലഭ്യമാക്കണമെന്നും സമ്മേളനം ആവശ്യപ്പെട്ടു. ഡോ. ശാന്തിജോസ്​, സാജൻ പുതിയോട്ടിൽ, കെ.പി.ഷീന, ശ്രീകല, സുവർണ്ണ ചന്ദ്രോത്ത്​, സിസ്​റ്റ റെജിൻ, ഹമീദ്​ വിലങ്ങിൽ, ഷിബു ചെറുകാട്​, ബിജി സജീവൻ എന്നിവർ സംസാരിച്ചു.