ട്രെയിൻ തട്ടി ചാലിയാറിൽ വീണ രണ്ടാമത്തെ​ യുവാവി​‍െൻറയും മൃതദേഹം കണ്ടെത്തി

ഫറോക്ക്: ട്രെയിൻ തട്ടി ചാലിയാറിൽ വീണു കാണാതായ രണ്ടാമത്തെ യുവാവി​‍െൻറ മൃതദേഹം കണ്ടെത്തി. ചെറുവണ്ണൂർ കുണ്ടായിത്തോട് തോണിച്ചിറ കോലോന്തറക്കൽ രാജ​‍െൻറ മകൻ രസ്നിക് എന്ന ശ്യാമി​‍െൻറ (26) മൃതദേഹമാണ് വെള്ളിയാഴ്ച രാവിലെ കണ്ടെത്തിയത്. ഫയർഫോഴ്‌സ് നടത്തിയ തിരച്ചിലിൽ ഫറോക്ക് റെയിൽവേ പാലത്തി​‍െൻറ തൂണിന്​ സമീപത്തുനിന്നാണ് മൃതദേഹം കിട്ടിയത്.

കഴിഞ്ഞ ദിവസം രാത്രി ഒമ്പതിന്​ മംഗലാപുരം- ചെന്നൈ എക്‌സ്പ്രസ് ട്രെയിനാണ് പാലത്തിനു സമീപം രണ്ടു യുവാക്കളെ ഇടിച്ചത്. അപകടത്തിൽ മരിച്ച കൊളത്തറ റഹ്‌മാൻ ബസാർ അയ്യപ്പൻകണ്ടി പറമ്പ് പുല്ലാലയിൽ അശോക​‍െൻറ മകൻ നിഖിലി​‍െൻറ(27) മൃതദേഹം വ്യാഴാഴ്ച രാത്രി തന്നെ പാലത്തിനു​ സമീപം കണ്ടെത്തിയിരുന്നു. മറ്റൊരു സുഹൃത്തിനൊപ്പം റെയിൽ പാളത്തിനു സമീപത്തുകൂടി നടന്നുവരുമ്പോഴായിരുന്നു ഇരുവരെയും ട്രെയിൻ ഇടിച്ചു തെറിപ്പിച്ചത്. ഒപ്പമുണ്ടായിരുന്ന യുവാവ് പരിക്കില്ലാതെ രക്ഷപ്പെട്ടു.

ലോക്കോ പൈലറ്റാണ് അപകടവിവരം ഫറോക്ക് സ്‌റ്റേഷനിൽ അറിയിച്ചത്. സ്‌റ്റേഷൻ മാസ്​റ്റർ നൽകിയ വിവരപ്രകാരം പൊലീസും ട്രോമ കെയർ വളൻറിയർമാരും കഴിഞ്ഞദിവസം രാത്രി തിരച്ചിൽ ആരംഭിച്ചിരുന്നു. രസ്‌നിക്കി​‍െൻറ മാതാവ്​ പരേതയായ തങ്കമണി. സഹോദരങ്ങൾ: രഞ്ജിത്ത്, രേഷ്മ.