തരിശുഭൂമിയെ ഹരിതാഭമാക്കാൻ സർക്കാർ ജീവനക്കാരൻ

നന്മണ്ട: കാലങ്ങളായി തരിശായിക്കിടക്കുന്ന ഭൂമിയിൽ നെൽകൃഷിക്കൊരുങ്ങുകയാണ് സർക്കാർ ജീവനക്കാരൻ. പൊതുമരാമത്ത് വകുപ്പ് ഉദ്യോഗസ്ഥനായ പുനത്തിൽ അബ്ബാസാണ് തരിശു ഭൂമിയെ ഹരിതാഭമാക്കി മാറ്റാൻ ഇറങ്ങിയത്. 

ഭക്ഷ്യസുരക്ഷ കർഷക​​െൻറ മാത്രം  ഉത്തരവാദിത്തമല്ലെന്നും സർക്കാർ ജീവനക്കാരും ഒന്നടങ്കം കാർഷികവൃത്തിയിലേക്ക് തിരിച്ചുവരണമെന്നും അബ്ബാസ് പറയുന്നു. കൃഷിയും കാർഷിക രീതിയും തിരിച്ചുവരവി​‍​െൻറ പാതയിലായിരിക്കുമ്പോഴാണ് ഈ എൻജിനീയർ കരനെൽകൃഷിയിൽ സജീവമാകുന്നത്.

ചീക്കിലോട് റോഡിലുള്ള കെ.പി. സുധാകര​​െൻറ അയ്യപ്പൻകണ്ടി പറമ്പും സ്വന്തം ഭൂമിയിലുമായാണ് കൃഷി. അയ്യപ്പൻകണ്ടി പറമ്പിലെ രണ്ട് ഏക്കറിലാണ് രക്തശാലി ഇനത്തിൽപ്പെട്ട  നെൽവിത്ത് വിതച്ചത്. വീട്ടുപറമ്പിലാവട്ടെ പച്ചക്കറി കൃഷിയുമുണ്ട്. 

84ലും കൃഷിയിൽ വ്യാപൃതനായ പിതാവ് പുനത്തിൽ മൂസയിൽനിന്ന് കിട്ടിയ നാട്ടറിവുകളും ഈ സർക്കാർ ഉദ്യോഗസ്ഥനെ കാർഷികവൃത്തിയിലേക്ക് ചുവടുറപ്പിക്കാൻ സഹായിച്ചു. 

സന്തതസഹചാരിയായ രത്നാകരൻ  മടവൻകണ്ടിയുടെയും സഹോദരങ്ങളുടെയും സുഹൃത്തുക്കളുടെയും പ്രോത്സാഹനവും അബ്ബാസിനുണ്ട്​.