തീപിടിത്തത്തി​​​െൻറ ആശങ്കയിൽ കോഴിക്കോട്​ നഗരം

കോഴിക്കോട്​: മഴമാറിയ രാത്രിയുണ്ടായ തീപിടിത്തം കേട്ടറിഞ്ഞ്​ ഫ്രാൻസിസ്​ റോഡ്​ ജങ്​ഷനിലും മേൽപ്പാലത്തിലും തടിച്ചുകൂടിയത്​​ വൻ ജനകൂട്ടം. രക്ഷാപ്രവർത്തനത്തിനും കാഴ്​ചക്കാരുമായി ആളുകൾ ഒഴുകിയതോടെ കോവിഡ്​ മാർഗ നിർദ്ദേശങ്ങൾ കാറ്റിൽ പറന്നു. പലതവണ പൊലീസിന്​ ജനകൂട്ടത്തെ നിയന്ത്രിക്കാൻ ഇടപെടേണ്ടിവന്നു. പുഷ്പ ജങ്​ഷനിൽ നിന്ന് റെയിൽവേ സ്​റ്റേഷനിലേക്കും ഫ്രാൻസിസ് റോഡിലേക്കുമുള്ള ഗതാഗതം പൂർണമായി പൊലീസ് തടഞ്ഞു.

സൗത്​ അസി. കമ്മീഷ്ണർ എ.ജെ. ബാബുവി​െൻറ നേതൃത്വത്തിൽ വൻ പൊലീസെത്തി. കോവിഡ്​ നിയന്ത്രണങ്ങൾ കർശനമാക്കിയ പന്നിയങ്കര, കുറ്റിച്ചിറ തുടങ്ങിയ വാർഡുകളോട്​ ചേർന്നായിരുന്നു തീപിടിത്തം. മണിക്കൂറുകൾ നഗരത്തെ ആശങ്കയിലാക്കിയ മൂന്ന്​ നില കെട്ടിടത്തിലെ അഗ്​നി ഏറെ പരിശ്രമത്തിനൊടുവിലാണ് നിയന്ത്രണത്തിലായത്​. തൊട്ടടുത്ത്​ കിടന്ന നിരവധി വീടുകളിൽ താമസക്കാരെ പൊലീസും ഫയർഫോഴ്​സും പുറത്തെത്തിക്കുകയായിരുന്നു. പലതവണ നിയന്ത്രണ വിധേയമെന്ന്​ തോന്നിയെങ്കിലും പെ​ട്ടെന്ന്​ ആളിപ്പടർന്നു.

റെയിൻ കോട്ടും മറ്റുമായി പ്ലാസ്​റ്റിക്കുകൾക്ക്​ തീപിടിച്ച്​ കറുത്ത പുക മൂടി തീയാളിയതോടെയാണ്​ കൂടുതൽ ഫയർ​േഫഫോഴ്സ് എത്തിയത്​. കെട്ടിടത്തിന് തൊട്ടടുത്ത്​ വീടിന് മുകളിൽ കയറി വെള്ളം പമ്പ് ചെയ്തതോടെയാണ്​​ ശമനമുണ്ടായത്​. മേൽപാലത്തിന് മുകളിലും താഴെയുമായി വാഹനങ്ങൾ നിർത്തിയാണ് രക്ഷാപ്രവർത്തനം നടത്തിയത്.

പ്രഥമ അന്വേഷണത്തില്‍ പത്ത് ലക്ഷത്തില്‍പരം രൂപയുടെ നാശനഷ്​ടം കണക്കാക്കുന്നു. അപകടകാരണം വ്യക്തമല്ല. കടയില്‍ അനുവദനീയമായ അളവില്‍ കൂടുതല്‍ വസ്തുക്കള്‍ സൂക്ഷിച്ചിരുന്നതായാണ് കണ്ടെത്തിയതെന്നും പരിശോധനകള്‍ നടത്തുമെന്നും സ്ഥിതിഗതികള്‍ വിലയിരുത്തിയ ശേഷം കലക്​ടർ പറഞ്ഞു.