ജാസറിന്​ മാധ്യമം വായനക്കാർ അയച്ചത് രണ്ടര ലക്ഷത്തിലധികം രൂപ

കോഴിക്കോട്​: മനുഷ്യസ്​നേഹികളുടെ അകമഴിഞ്ഞ പിന്തുണക്കൊപ്പം സെറിബ്രൽ പാൾസി ബാധിതനായ ജാസറിന് സർക്കാറി​െൻറ സാന്ത്വനവും. അപൂർവ വൈകല്യത്തിന്​ അഞ്ചോളം ശസ്​ത്രക്രിയകൾക്ക്​ സഹായം തേടുന്ന മുഹമ്മദ്​ ജാസറിന്​ നാഷനൽ ട്രസ്​റ്റ്​ ജില്ലതല സമിതി ഇടപെട്ട്​ ലക്ഷം രൂപയുടെ പരിശീലനത്തിനും ചികിത്സക്കും കവറേജുള്ള സർക്കാർ ഇൻഷുറൻസ് ഹെൽത്ത് കാർഡ് നൽകി.

കൂടാതെ ലീഗൽ ഗാർഡിയൻഷിപ് ലഭ്യമാക്കാനും സർക്കാർ തലത്തിൽ ലഭിക്കേണ്ടുന്ന വിവിധ ആനുകൂല്യങ്ങളും സ്കോളർഷിപ്പും സംബന്ധിച്ച കാര്യങ്ങളും നൽകാനുള്ള നടപടികൾക്ക്​ തീരുമാനിച്ചതായി നാഷനൽ ട്രസ്​റ്റ്​ ജില്ലതല സമിതി കൺവീനർ പി. സിക്കന്തർ അറിയിച്ചു. ജാസറിനെ സന്ദർശിച്ച്​ ഇതുമായി ബന്ധപ്പെട്ട രേഖകൾ കൈമാറി.

'ജാസറിനെയും ഉമ്മയെയു​ം സഹായിക്കാതിരിക്കാൻ ആർക്കാണ്​ കഴിയുക' എന്ന തലക്കെട്ടിൽ മാധ്യമം തിങ്കളാഴ്​ച പ്രസിദ്ധീകരിച്ച റിപ്പോർട്ടിനെ തുടർന്നാണ്​ നാഷനൽ ട്രസ്​റ്റി​െൻറ ഇടപെടൽ.

ഇതിനകം 2,52,875 രൂപ ജാസറിന്​ മാധ്യമം വായനക്കാരിൽ നിന്ന്​ സഹായമായെത്തി. സെറിബ്രൽ പാൾസിയോടൊപ്പം അപൂർവ വൈകല്യങ്ങളും പ്രയാസപ്പെടുത്തുന്ന ജാസറിന്​ അഞ്ച്​ ശസ്​ത്രക്രിയകൾക്ക്​ പണം വേണം. 73064 43094 എന്ന നമ്പറിൽ ഗൂഗ്​ൾ പേ വഴിയും ജാസറിന്​ സഹായമയക്കാം. കോഴിക്കോട്​ നല്ലളം കനറാ ബാങ്കിൽ അക്കൗണ്ടുണ്ട്​. A/C No 5420127000308. IFSC Code: CNRB0005420 MICR Code: 673015024.