ദേശീയപാത വികസനം: മുൻകൂർ നഷ്​ടപരിഹാരത്തിനായി വ്യാപാരികൾ സമരത്തിന്​

പയ്യോളി: ദേശീയപാത വികസനവുമായി ബന്ധപ്പെട്ട് സർക്കാർ പ്രഖ്യാപിച്ച നഷ്​ടപരിഹാരവും പുനരധിവാസ പാക്കേജും മുൻകൂറായി നൽകണമെന്നാവശ്യപ്പെട്ട് പയ്യോളി ടൗണിലെ വ്യാപാരികൾ സമരത്തിലേക്ക്.

2013ലെ എൽ.എ ആക്ട് പ്രകാരമുള്ള പുനരധിവാസവും സംസ്ഥാന സർക്കാർ വ്യാപാരികൾക്കായി പ്രഖ്യാപിച്ചിട്ടുള്ള നഷ്​ടപരിഹാരവും കടകൾ ഒഴിപ്പിക്കുന്നതിന് മുമ്പായി നൽകണമെന്നാണ് വ്യാപാരികളുടെ ആവശ്യം. പ്രഖ്യാപിച്ച നഷ്​ടപരിഹാരം കടകൾ ഒഴിഞ്ഞതിനുശേഷം മാത്രമേ വിതരണം ചെയ്യൂവെന്ന അധികൃതരുടെ നിലപാടിനോട് യോജിക്കാനാവില്ലെന്ന് കടയുടമകൾ വ്യക്തമാക്കി. മാത്രമല്ല നഗരസഭയിലെ തന്നെ സമീപപ്രദേശങ്ങളിലെ ദേശീയപാതയോരത്തെ വീടുകൾക്കും കെട്ടിടങ്ങൾക്കും മുൻകൂറായി നഷ്​ടപരിഹാര തുക നൽകിയിട്ടുണ്ടെന്നും വ്യാപാരികൾ വികസനത്തിന് ഒരിക്കലും എതിരല്ലെന്നും തങ്ങൾക്ക് സർക്കാർ പ്രഖ്യാപിച്ച നഷ്​ടപരിഹാരം ലഭിക്കണമെന്നതു മാത്രമാണ് ആവശ്യമെന്നും വ്യാപാരികൾ പറഞ്ഞു.

ജില്ലയിൽ ഏറ്റവും കൂടുതൽ കടകൾ ഒഴിപ്പിക്കേണ്ടിവരുന്ന ടൗണാണ് പയ്യോളി. ദേശീയപാതയോരത്തെ ഇരുവശത്തുമായി നൂറോളം വ്യാപാര സ്ഥാപനങ്ങളാണ് വികസനത്തി​െൻറ ഭാഗമായി നഷ്​ടപ്പെടുന്നത്.

മതിയായ നഷ്​ടപരിഹാരത്തിനായി മൂരാട് മുതൽ തിരുവങ്ങൂർ വരെയുള്ള വ്യാപാരികൾ ഇതിനകം ഹൈകോടതിയിൽ കേസ് ഫയൽ ചെയ്തിട്ടുണ്ട്. കേന്ദ്ര- കേരള സർക്കാറുകൾക്ക് നിവേദനവും സമർപ്പിച്ചിട്ടുണ്ട്. വിഷയത്തിൽ വ്യാപാരി വ്യവസായി ഏകോപന സമിതി പയ്യോളി യൂനിറ്റ് സംഘടിപ്പിക്കുന്ന റിലേ നിരാഹാര സത്യഗ്രഹത്തിന്​ നവംബർ ഒന്നിന് രാവിലെ 10ന്​ പയ്യോളി ബസ്​സ്​റ്റാൻഡ് പരിസരത്ത് തുടക്കമാവും.

സംസ്ഥാന പ്രസിഡൻറ്​ ടി. നസിറുദ്ദീൻ ഉദ്ഘാടനം ചെയ്യും. യൂനിറ്റ് പ്രസിഡൻറ്​ കെ.പി. റാണാപ്രതാപ് അധ്യക്ഷത വഹിക്കും.