മെഡി. കോളജ്​ സർജിക്കൽ ഷോപ്പിലെ കവർച്ച: ഒമ്പതു ലക്ഷത്തിന്​ തുമ്പില്ല

കോഴിക്കോട്​: മെഡിക്കൽ കോളജ്​ ആശുപത്രി വികസന സമിതിയുടെ സർജിക്കൽ ഷോപ്പിൽ നിന്ന്​ ഒമ്പതുലക്ഷത്തിലേറെ രൂപ കവർന്ന സംഭവത്തിൽ ഒരുവർഷമായിട്ടും പ്രതികളെ പിടികൂടാനാകാതെ പൊലീസ്​.

അന്വേഷണം എവിടെയുമെത്താതെ ഒമ്പത് ലക്ഷത്തിലേറെ വരുന്ന തുക അധികൃതർ മറന്ന മട്ടാണ്. കോവിഡിന് മുമ്പുനടന്ന ആശുപത്രി വികസന സമിതി യോഗങ്ങളിൽ മോഷണം വലിയ ചർച്ചാ വിഷയമായെങ്കിലും ഒരു തീരുമാനവും നടപ്പാക്കപ്പെട്ടിട്ടില്ല.

കോവിഡ് കാലത്ത്​ ആശുപത്രി വികസന സമിതി ഒാൺലൈൻ യോഗം​ നടത്തിയെങ്കിലും അവയിലൊന്നും മോഷണം സംബന്ധിച്ച വിഷയം ചർച്ചയായില്ല.

കോവിഡ് തിരക്കുകൾ ആയതോടെ മറ്റെല്ലാം മറന്ന മട്ടാണ്. സംഭവത്തിൽ സിറ്റി പൊലീസ്​ മേധാവിയുടെ നേതൃത്വത്തിൽ അന്വേഷണം നടക്കുന്നുണ്ടെങ്കിലും ഇതുവരെയും പ്രതീക്ഷക്ക് വകയായിട്ടില്ല. മോഷണം നടന്ന ദിവസം ജോലിയിൽ ഉണ്ടായിരുന്ന മൂന്നു ജീവനക്കാർ അറിയാതെ പണം നഷ്​ടമാകി​െല്ലന്ന് ആശുപത്രി അധികൃതർ പരസ്പരം അഭിപ്രായപ്പെടുന്നുണ്ടെങ്കിലും പണം നഷ്​ടമായത് സംബന്ധിച്ച വിവരങ്ങളൊന്നും ലഭിച്ചിട്ടില്ല.

മോഷണം നടന്ന ദിവസം ജോലിയിലുണ്ടായിരുന്ന മൂന്ന് ജീവനക്കാരെ പോളിഗ്രാഫ് ടെസ്​റ്റിന് വിധേയമാക്കുമെന്ന് പറഞ്ഞിരുന്നു. ഒരാൾ എതിർപ്പ് അറിയിച്ചതിനാൽ നടപടിക്രമങ്ങളൊന്നും പൂർത്തിയാക്കിയിട്ടില്ല.

മോഷണം വാർത്തയായപ്പോൾ രണ്ട്​ താൽക്കാലിക ജീവനക്കാരെ സസ്​പെൻഡ്​ ചെയ്യുകയും പണം അന്നന്ന്​ ബാങ്കിൽ നിക്ഷേപിക്കാനും എച്ച്​.ഡി.എസ്​ തീരുമാനമെടുത്തിരുന്നു. മോഷണത്തെ തുടർന്ന്​ സർജിക്കൽ ഷോപ്​ ആശുപത്രിക്കുള്ളിലേക്ക്​ മാറ്റുന്ന കാര്യം എച്ച്​.ഡി.എസ്​ യോഗം പരിശോധിക്കുകയും അതിന്​ എസ്​റ്റിമേറ്റ്​ തയാറാക്കുകയും ചെയ്​തിരുന്നു.

ഇതും പലവിധ വിവാദങ്ങളിൽപെട്ട് കെട്ടടങ്ങി. നേരത്തെയും എച്ച്​.ഡി.എസിൽനിന്ന്​ ആറു ലക്ഷം രൂപ കളവുപോയിരുന്നു. പിന്നീട്​ ആ സംഭവത്തെക്കുറിച്ച്​ ഒരു വിവരവുമില്ല. അതുപോലെ ഒമ്പതു ലക്ഷവും മറവിയിലാഴുകയാണ്​.

സാമ്പത്തിക ബാധ്യതയിൽപെട്ട്,​ ജീവനക്കാരുടെ ശമ്പളം പോലും വർധിപ്പിക്കാൻ വഴിയില്ലാതെ ഉഴറുന്നതിനിടെയാണ്​ എച്ച്​.ഡി.എസി​ൽ മോഷണം കണ്ടെത്താൻ നടപടി സ്വീകരിക്കാൻപോലും അധികൃതർ തയാറാകാത്തത്​.