ഓണവിപണി: പച്ചക്കറിവില കുതിക്കുന്നു

കൊയിലാണ്ടി: ഓണം പടിവാതിൽക്കലിൽ എത്തിനിൽക്കെ, പിടിതരാതെ പച്ചക്കറിവില കുതിച്ചുയരുന്നു. ഓണക്കാലത്തെ ഉയർന്ന ആവശ്യമാണ് വിലക്കയറ്റത്തിനു പിന്നിൽ. പച്ചക്കറി വിഭവങ്ങൾകൊണ്ടാണ് ഓണസദ്യ ഒരുക്കുക. വർധിച്ച ആവശ്യത്തോടൊപ്പം ഇവയുടെ വരവു കുറഞ്ഞതുമാണ് വിലക്കയറ്റത്തിനു കാരണമെന്ന് കച്ചവടക്കാർ പറഞ്ഞു.

അനുദിനം വില കൂടുകയാണ്. കടകളിൽ തോന്നിയ വിലയാണ്​ ഈടാക്കുന്നത്. ഒരേ അങ്ങാടിയിൽതന്നെ പല വില. ഇങ്ങനെ പോയാൽ, ഓണംനാളിൽ വിലയിൽ ഇനിയും വർധന ഉണ്ടാകാനാണ് സാധ്യത. വിപണിയിൽ ഇതുവരെ അധികൃതരുടെ ഇടപെടൽ ഉണ്ടായിട്ടില്ല.

ഓണത്തിന് ഒഴിച്ചുകൂടാൻ പറ്റാത്തതാണ് നേന്ത്രക്കായയും ഇവകൊണ്ട്​ നിർമിക്കുന്ന വിഭവങ്ങളും. ശർക്കര ഉപ്പേരിയും വറുത്ത ഉപ്പേരിയുമൊക്കെ പ്രധാനം. ഇവയില്ലാതെ ഓണസദ്യയില്ല. നേന്ത്രക്കായയാണ് ഇതി​െൻറ പ്രധാന അസംസ്കൃത വസ്തു. ഓണം അടുത്തതോടെ ഇവയുടെ വിലയും വർധിച്ചു. 35 മുതൽ 40 രൂപ വരെയായിരുന്നു ആഴ്ച മുമ്പ് കിലോ നേന്ത്രക്കായയുടെ വില. ബുധനാഴ്ച 50 മുതൽ 60 വരെയായി ചില്ലറ വില.

വിലക്കയറ്റം വാഴകർഷകർക്ക് ഗുണപ്രദമാണ്​. നേരത്തേ വിലയിടിവു കാരണം കർഷകർക്ക്​ വൻ നഷ്​ടം സംഭവിച്ചിരുന്നു. ഓണവിപണി ലക്ഷ്യംവെച്ച് വാഴകൃഷി നടത്തിയവർക്ക് വിലവർധന ഗുണം ചെയ്യും.