പൊലീസുകാർക്ക്​ കോവിഡ്​: സേനയിൽ ജാഗ്രത

കോഴിക്കോട്​: വിജിലൻസിൽ ഉൾപ്പെടെ വിവിധ സ്​റ്റേഷനുകളിലെ പൊലീസുകാർക്ക്​ കോവിഡ്​ സ്ഥിരീകരിച്ചതോടെ സേന അതിജാഗ്രതയിൽ. രോഗബാധിതരുമായി സമ്പർക്കമുണ്ടായവരോട്​ മുഴുവൻ ക്വാറൻറീനിൽ പ്രവേശിക്കാൻ നിർദേശിച്ചിട്ടുണ്ട്​. മാത്രമല്ല, സേനാംഗങ്ങൾക്കുള്ള ആൻറിജൻ പരിശോധന പുരോഗമിക്കുകയാണ്​. സ്​റ്റേഷനുകളിലുൾപ്പെടെ പ്രതിരോധ നടപടികൾ ഉൗർജിതമാക്കി​.

വിജിലന്‍സ് ആന്‍ഡ് ആൻറി കറപ്ഷന്‍ ബ്യൂറോ, റൂറൽ എസ്​.പി ഒാഫിസ്​, തിരുവമ്പാടി, താമരശ്ശേരി, ബേപ്പൂർ സ്​റ്റേഷനുകൾ എന്നിവിടങ്ങളിലെ ഉദ്യോഗസ്ഥർക്കാണ്​ ഇതിനകം കോവിഡ്​ പോസിറ്റിവായത്​.

വിജിലന്‍സിൽ സി.​െഎക്കും ഡ്രൈവര്‍ക്കുമാണ്​ കോവിഡ്​ പോസിറ്റിവായത്​. പരപ്പനങ്ങാടി സ്വദേശിയാണ് ഡ്രൈവര്‍. ഇദ്ദേഹത്തി​െൻറ അടുത്തബന്ധുവിന് നേ​രത്തേ കോവിഡ് സ്ഥിരീകരിച്ചിരുന്നു. കഴിഞ്ഞ ദിവസമാണ് പരിശോധനഫലം പോസിറ്റിവായത്. ഡ്രൈവറുമായി സമ്പര്‍ക്കത്തിലേര്‍പ്പെട്ട ഓഫിസിലെ എട്ടുപേര്‍ ക്വാറൻറീനിലാണ്​. അതേസമയം, സി.ഐക്ക്​ ബുധനാഴ്​ചയാണ്​ പോസിറ്റിവായതെന്ന് ഡി.എം.ഒ വി. ജയശ്രീ പറഞ്ഞു. ഡ്രൈവറുമായി സി.ഐക്ക്​ സമ്പര്‍ക്കമില്ലെന്നാണ് വിവരം. ഉദ്യോഗസ്ഥർക്ക്​ കോവിഡ് സ്ഥിരീകരിച്ചതോടെ വിജിലന്‍സ് കോഴിക്കോട് യൂനിറ്റ് ഓഫിസ് ബുധനാഴ്​ച അടച്ചിട്ടു. അണുമുക്തമാക്കിയശേഷം ഒാഫിസ്​ പ്രവർത്തനമാരംഭിക്കും.

വടകര പുതുപ്പണത്തെ റൂറല്‍ എസ്​.പി ഓഫിസിൽ കോഴിക്കോട്​ സ്വദേശിയായ ഹെഡ്​ ക്ലർക്കിനാണ്​​ കോവിഡ്​ സ്ഥിരീകരിച്ചത്​. ഒരാഴ്ചയായി ഇദ്ദേഹം ഓഫിസില്‍ വന്നിരുന്നില്ല. 38 ജീവനക്കാരാണ് ഇവിടെയുള്ളത്. ഒാഫിസിലെ പരമാവധി ജീവനക്കാരോട് വീട്ടിലിരുന്ന്​ ജോലിചെയ്യാന്‍ എസ്​.പി ഡോ. എ. ശ്രീനിവാസ്​ നിര്‍ദേശിച്ചു​. തിരുവമ്പാടി സ്​റ്റേഷനിലെ എസ്​.​െഎക്കാണ്​ റാൻഡം ടെസ്​റ്റിൽ പോസിറ്റിവായത്​. ഇവിടത്തെ 27 ഉദ്യോഗസ്ഥരാണ്​​ ക്വാറൻറീനിൽ പോയത്​​.

താമരശ്ശേരി സ്​റ്റേഷനിൽ ഗ്രേഡ്​ എസ്​.​െഎ, വനിത ഉൾപ്പെടെ രണ്ടു​ സിവിൽ പൊലീസ്​ ഒാഫിസർമാർ എന്നിവർക്കാണ്​ ഇതിനകം കോവിഡ്​ സ്ഥിരീകരിച്ചത്​. ഇതോടെ 38 ഉദ്യോഗസ്ഥർ ​ക്വാറൻറീനിലാണ്​.

നേരത്തേ പൊലീസുകാർക്കായി നടത്തിയ ആൻറിജൻ പരിശോധനയിൽ താമരശ്ശേരി, എലത്തൂർ, വെള്ളയിൽ, സിറ്റി ട്രാഫിക്​ യൂനിറ്റ്​, പിങ്ക്​ പട്രോൾ എന്നിവിടങ്ങളിലെ ചില ഉദ്യോഗസ്ഥർക്ക്​ പോസിറ്റിവായിരുന്നെങ്കിലും സ്രവപരിശോധനയിൽ രോഗബാധയില്ലെന്ന്​ സ്ഥിരീകരിക്കുകയായിരുന്നു.