കഞ്ചാവ് വില്‍പന സംഘങ്ങള്‍ വടകരയിൽ ഏറ്റുമുട്ടി; നാല് പേര്‍ക്ക് പരിക്ക്

വടകര: നഗരത്തില്‍ പട്ടാപ്പകല്‍ കഞ്ചാവ് വില്‍പന സംഘങ്ങള്‍ ഏറ്റുമുട്ടി. കത്തിക്കുത്തില്‍ നാലു പേര്‍ക്ക് പരിക്കേറ്റു. ഗുരുതരമായി പരിക്കേറ്റവരെ വിദഗ്​ധ ചികിത്സക്കായി കോഴിക്കോട്ടേക്ക് മാറ്റി.

വെള്ളിയാഴ്ച ഉച്ചക്ക്​ 2.30 ഓടെ വടകര ദേശീയപാതയോരത്തുവെച്ചാണ് കഞ്ചാവ് സംഘങ്ങള്‍ ഏറ്റുമുട്ടിയത്. ഏറ്റുമുട്ടലില്‍ സാരമായി പരിക്കേറ്റ തോടന്നൂര്‍ സലാവുദീന്‍, പുതുപ്പണം ഷാജഹാന്‍, സവാദ് എന്നിവരെ വടകര ജില്ല ആശുപത്രിയിലെ ​പ്രാഥമിക ചികിത്സക്ക്​ശേഷം വിദഗ്​ധ ചികിത്സക്കായി കോഴിക്കോട്ടേക്ക് മാറ്റി.

കഞ്ചാവ് വില്‍പന സംബന്ധിച്ച തര്‍ക്കമാണ് കത്തിക്കുത്തിന് ഇടയാക്കിയതെന്ന്​ പൊലീസ് പറഞ്ഞു. അഞ്ച് പേര്‍ തമ്മിലാണ് തര്‍ക്കം നടന്നത്. സുഹൈല്‍ എന്നൊരാള്‍ക്കും പരിക്കുണ്ട്. മറ്റൊരാളെ തിരിച്ചറിഞ്ഞതായും മറ്റുവിവരങ്ങള്‍ ശേഖരിച്ച് വരുന്നതായും പൊലീസ് പറഞ്ഞു.