കോവിഡ്​ കാലത്തെ വയോജനങ്ങളുടെ അതിജീവന ശീലങ്ങൾ; വെബിനാർ ഒക്​ടോബർ ഒന്നിന്​

കോഴിക്കോട്​: വയോജന ക്ഷേമത്തിനായി കോഴിക്കോട്​ കേന്ദ്രമായി പ്രവർത്തിക്കുന്ന ലിവിങ്​ ലൈഫ്​ ട്രസ്റ്റിന്‍റെയും വയോജനങ്ങളുടെ പകൽവീടായ തറവാടിന്‍റെയും ആഭിമുഖ്യത്തിൽ ലോക വയോജന ദിനമായ ഒക്​ടോബർ ഒന്നിന്​ വെബിനാർ നടത്തും. കോവിഡ്​ മഹാമാരിയിൽ മാനസിക-ശാരീരിക ക്ലേശങ്ങളാലും വിവേചനങ്ങളാലും പ്രതിസന്ധിയിലായിരിക്കുന്ന വയോജനങ്ങൾക്ക്​ അതിജീവനത്തിന്‍റെ ശൈലികൾ ചർച്ച ചെയ്യുന്നതിനും സംശയനിവാരണങ്ങൾക്കുമായാണ്​ വെബിനാർ സംഘടിപ്പിക്കുന്നത്​.

മുതിർന്ന പൗരന്മാരുടെ ക്ഷേമത്തിനായുള്ള ജില്ലാതല അധികാരിയായ ആർ.ഡി.ഒ ചെൽസാസിനി വി. മുഖ്യസന്ദേശം നൽകും. ഇംഹാൻസ്​ സോഷ്യൽ വർക്ക്​ ഡിപാർട്ട്​മെന്‍റ്​ മേധാവി ഡോ. സീമ പി. ഉത്തമൻ ചർച്ചകൾക്ക്​ നേതൃത്വം നൽകുകയും സംശയനിവാരണം നടത്തുകയും ചെയ്യും. ഹോളി ക്രോസ്​ കോളജ്​ സാമൂഹികക്ഷേമ വിഭാഗം അധ്യാപകൻ അഖിൽ വർഗീസ്​ സന്ദേശം നൽകും. ലിവിങ്​ ലൈഫ്​ ട്രസ്റ്റ്​ ചെയർപേഴ്​സൺ ഡാർളിൻ പി. ജോർജ്​ നേതൃത്വം നൽകും. വിവരങ്ങൾക്ക്​: 7972140381, 9995880046.