വി.പി. ഹുസൈൻകോയ തങ്ങൾക്ക് ജന്മനാട് ആദരമൊരുക്കുന്നു

പൊന്നാനി: പൊന്നാനിയുടെ രാഷ്ട്രീയ-സാമൂഹിക-സാംസ്കാരിക രംഗത്ത് പ്രവർത്തിക്കുന്ന മുൻ നഗരസഭ ചെയർമാൻ വി.പി. ഹുസൈൻകോയ തങ്ങൾക്കുള്ള ജന്മനാടിന്‍റെ ആദരം ശനിയാഴ്ച നടക്കും. പതിറ്റാണ്ടുകൾക്ക് മുമ്പ് പൊന്നാനി ടൗൺ കേന്ദ്രീകരിച്ച് കലാ-കായിക സന്നദ്ധ പ്രവർത്തന രംഗങ്ങളിൽ പ്രവർത്തിച്ചിരുന്ന യുവജന കൂട്ടായ്മയായിരുന്ന പൊന്നാനി യൂത്ത് ആർട്സ് ആൻഡ്​ കൾചറൽ അസോസിയേഷൻ പ്രവർത്തകരുടെ നവ കൂട്ടായ്മയായ ജെ.എം.ആർ.സിയുടെ സുഹൃദ് സംഗമം ഉച്ചക്ക് മൂന്നിന്​ പൊന്നാനി എം.ഐ ബോയ്സ് സ്കൂളിൽ നടക്കും. ഇ.ടി. മുഹമ്മദ് ബഷീർ എം.പി, മുൻ സ്പീക്കർ പി. ശ്രീരാമകൃഷ്ണൻ, നഗരസഭ ചെയർമാൻ ശിവദാസ് ആറ്റുപുറം ഉൾപ്പെടെയുള്ളവർ ചടങ്ങിൽ പങ്കെടുക്കും. വൈകീട്ട് കലാപരിപാടികളും നടക്കും. വാർത്തസമ്മേളനത്തിൽ ടി.കെ. അഷ്റഫ്, കെ. ഇമ്പിച്ചിക്കോയ, വി. അബ്​ദുൽ ഗഫൂർ, വി.കെ. കബീർ എന്നിവർ പങ്കെടുത്തു.