ബുൾഡോസർ രാജ് അവസാനിപ്പിക്കണം -എം.എസ്.എസ്

ചാവക്കാട്: പ്രവാചക നിന്ദക്കെതിരെ പ്രതിഷേധിച്ചവരെ വേട്ടയാടാനുള്ള ഭരണകൂട നീക്കം പ്രതിഷേധാർഹമാണെന്ന് എം.എസ്.എസ് ജില്ല കമ്മിറ്റി യോഗം അഭിപ്രായപ്പെട്ടു. തങ്ങൾക്ക് യോജിക്കാനാവാത്തവരുടെ വീടുകൾ ബുൾഡോസർ വെച്ച് തകർക്കുന്നതും അവരുടെ വരുമാന സ്രോതസ്സുകൾ നശിപ്പിക്കാൻ ശ്രമിക്കുന്നതും അത്യധികം പ്രാകൃതമാണ്. അടിയന്തരമായി പാർലമൻെറ് വിളിച്ചുകൂട്ടുകയും സർവകക്ഷി യോഗം വിളിച്ചുചേർത്ത് രാജ്യത്തിന്‍റെ നിലനിൽപ്പിന്നെ തന്നെ ബാധിക്കുന്ന പ്രധാനപ്പെട്ട ഈ വിഷയത്തിന് പരിഹാരം കാണണമെന്നും യോഗം ആവശ്യപ്പെട്ടു. സംസ്ഥാന സെക്രട്ടറി ടി.എസ്. നിസാമുദ്ദീൻ ഉദ്ഘാടനം ചെയ്തു. ജില്ല പ്രസിഡന്റ് കെ.എസ്.എ. ബഷീർ അധ്യക്ഷത വഹിച്ചു. ജില്ല സെക്രട്ടറി എ.കെ. അബ്ദുറഹ്​മാൻ, ടി.കെ. അബ്ദുൽ കരീം, പി.വി. അഹമ്മദ്കുട്ടി, അംജദ് കാട്ടകത്ത്, എം.പി. ബഷീർ, ടി.വി. സൈനുദ്ദീൻ, നസീർ അഷ്റഫ്, ഹാരിസ് കെ. മുഹമ്മദ് എന്നിവർ സംസാരിച്ചു.