കാര്‍ഷിക വികസന ബാങ്കിലെ നാല് ഡയറക്ടര്‍മാര്‍ തെരഞ്ഞെടുപ്പ് ബഹിഷ്‌കരിച്ചു

ബ്ലോക്ക് പ്രസിഡന്‍റിന്‍റെ അനുയായികള്‍ ഭീഷണിപ്പെടുത്തിയെന്ന് ഗുരുവായൂര്‍: ചാവക്കാട് പ്രാഥമിക കാര്‍ഷിക വികസനഗ്രാമ സഹകരണ ബാങ്ക് പ്രസിഡന്‍റ്​, വൈസ് പ്രസിഡന്‍റ്​ തെരഞ്ഞെടുപ്പ് ബഹിഷ്കരിച്ചതായി നാല് ഭരണസമിതി അംഗങ്ങള്‍ വാര്‍ത്തസമ്മേളനത്തില്‍ അറിയിച്ചു. ടി.വി. കൃഷ്ണദാസ്, ടി.പി. മുംതാസ്, എച്ച്.എ. ഷാജഹാന്‍, മൂക്കന്‍ കാഞ്ചന എന്നിവരാണ് ബഹിഷ്കരിച്ചത്. ഭരണസമിതി അംഗങ്ങളായി ചുമതലയേല്‍ക്കാന്‍ ചേര്‍ന്ന യോഗത്തില്‍ തങ്ങള്‍ ബന്ദികളായ അവസ്ഥയായിരുന്നെന്ന് ഡയറക്ടര്‍മാര്‍ പറഞ്ഞു. കോണ്‍ഗ്രസ് ബ്ലോക്ക് പ്രസിഡന്‍റിന്‍റെ അനുയായികള്‍ തങ്ങള്‍ക്ക് നേരെ ആക്രോശിക്കുകയും മിനിറ്റ്​സില്‍ ഒപ്പിടാന്‍ ഭീഷണിപ്പെടുത്തുകയും ചെയ്തു. പ്രിസൈഡിങ് ഓഫിസറും ഇതിനെല്ലാം കൂട്ടുനിന്നു. തെരഞ്ഞെടുപ്പ് സംബന്ധിച്ച് ബ്ലോക്ക് പ്രസിഡന്‍റ്​ ഡി.സി.സി പ്രസിഡന്‍റിനെ അറിയിക്കുകയോ പാര്‍ലമെന്‍ററി പാര്‍ട്ടി യോഗം ചേരുകയോ ചെയ്തില്ല. തനിക്കിഷ്ടമുള്ള പ്രസിഡന്‍റിനെയും വൈസ് പ്രസിഡന്‍റിനെയും വാഴിക്കാനാണ് ബ്ലോക്ക് പ്രസിഡന്‍റ്​ ശ്രമിച്ചത്. ബ്ലോക്ക് പ്രസിഡന്‍റിനെതിരെ അച്ചടക്ക നടപടി സ്വീകരിക്കണമെന്നും ആവശ്യപ്പെട്ടു. ഡയറക്ടര്‍മാരായ ചുമതലയേറ്റശേഷം നടപടി ബഹിഷ്കരിക്കാന്‍ ഡി.സി.സി നിര്‍ദേശം നല്‍കിയിരുന്നതായും വാര്‍ത്തസമ്മേളനത്തില്‍ അറിയിച്ചു. പ്രിസൈഡിങ് ഓഫിസറുടെ നടപടികള്‍ക്കെതിരെയും പരാതി നല്‍കിയിട്ടുണ്ട്.