മലപ്പുറത്തിന്‍റെ സിവിൽ സർവിസ്​: രാഷ്ട്ര നിർമാണ പ്രക്രിയയുടെ ഭാഗമാകാം -മുഹമ്മദലി ശിഹാബ്​

നിശ്ചായദാർഢ്യം മാത്രം കൈമുതലാക്കി പ്രതിസന്ധി സാഹചര്യങ്ങളെ എല്ലാം പൊരുതി തോൽപ്പിച്ച്​ സിവിൽ സർവിസ്​ എന്ന രാജ്യത്തെ ഉയർന്ന പരീക്ഷയിൽ നേട്ടം കൊയ്തയാളാണ്​ മുഹമ്മദലി ശിഹാബ്​. നിരവധി മത്സര പരീക്ഷകളിൽ വിജയം നേടിയ എടവണ്ണപ്പാറ സ്വദേശി ശിഹാബിന്​ സിവിൽ സർവിസ്​ റാങ്ക്​ പട്ടികയിലും ഇടംപിടിക്കാൻ സാധിച്ചു. 2011 ബാച്ചിൽ 226 ാം റാങ്കുകാരനായാണ്​ ശിഹാബ്​ സിവിൽ സർവിസിൽ പ്രവേശിക്കുന്നത്​. മുക്കം അനാഥാലയത്തിൽ പഠിച്ച്​ വളർന്ന ശിഹാബ്​ നാഗാലാന്‍റ്​ കാഡറിൽ 2012 ജൂലൈയിലാണ്​ സർവിസിൽ പ്രവേശിക്കുന്നത്​.

ശിഹാബ്​ താൻ പിന്നിട്ട ജീവിത കഥകളുമായി 'വിരലറ്റം' പേരിൽ പുസ്തകവും പ്രസിദ്ധീകരിച്ചു. നിരവധി മത്സര പരീക്ഷകളിൽ വിജയം നേടിയതിന്​ ശേഷമാണ്​ സിവിൽ സർവിസിനായി ശ്രമം ആരംഭിച്ചത്​. ഒന്നിന്​ പിറകെ പി.എസ്​.സി നിയമന ഉത്തരവുകൾ വന്നുകൊണ്ടിരിക്കുന്നതിനിടെയാണ്​ സിവിൽ സർവിസ്​ മോഹം തലക്ക്​ പിടിക്കുന്നതും കഠിന പരിശീലനം നടത്തുന്നതും. പരിശീലന കാലയളവിന്​ ശേഷം കൊഹിമ ജില്ലയിലെ സുബ്​സ സബ്​ ഡിവിഷനി​ൽ സബ്​ കലക്ടറായാണ്​ തുടക്കം. പിന്നീട്​ മ്യാൻമർ അതിർത്തിയായ കിഫ്​റെ ഉൾപ്പെടെ മൂന്ന്​​ ജില്ലകളുടെ കലക്ടർ സ്ഥാനം വഹിച്ചു. നിലവിൽ ഊർജ വകുപ്പ്​ സെക്രട്ടറിയാണ്​. ഭാര്യ: ആയിഷ ഫെമിന (ഗവ. സ്കൂൾ, അധ്യാപിക). മക്കൾ: ലിയ നവൽ, ലസിൻ അഹമ്മദ്​, ഐയ്​റ നവൽ.